ye aur baat ki us se hai wasta dil ka

ye aur baat ki us se hai vāsta dil kā

jo aa gayā to ajab haal ho gayā dil kā

jo chāhe dekhnā dekhe vo bātinī tasvīr

uThā.e haath meñ phirtā huuñ aa.ina dil kā

sukūñ mile to fasurda ho iztirāb to ḳhush

samajh sakā na koī bhī mo.āmla dil kā

ab āḳhir aise musāfir ko kyā kahā jaa.e

jo pūchhtā hai har ik gaam faisla dil kā

jo bevafā haiñ vahī apnoñ jaise lagte haiñ

ajiib logoñ se rahtā hai vāsta dil kā

qabā.eñ vaqt ne ma.anī kī laakh pahnā.īñ

magar samajh na sakā koī falsafa dil kā

bachā ke rakhnā hai ai 'shān' dostī kā bharam

vagarna kam nahīñ hone kā fāsla dil kā

ye aur baat ki us se hai wasta dil ka

jo aa gaya to ajab haal ho gaya dil ka

jo chahe dekhna dekhe wo baatini taswir

uThae hath mein phirta hun aaina dil ka

sukun mile to fasurda ho iztirab to KHush

samajh saka na koi bhi moamla dil ka

ab aaKHir aise musafir ko kya kaha jae

jo puchhta hai har ek gam faisla dil ka

jo bewafa hain wahi apnon jaise lagte hain

ajib logon se rahta hai wasta dil ka

qabaen waqt ne mani ki lakh pahnain

magar samajh na saka koi falsafa dil ka

bacha ke rakhna hai ai 'shan' dosti ka bharam

wagarna kam nahin hone ka fasla dil ka