ye baat munkashif hui charag ke baghair bhi

ye baat munkashif huī charāg ke baġhair bhī

maiñ DhūñD lūñgā har ḳhushī charāg ke baġhair bhī

huā thā jis jagah kabhī visāl-e-yār dosto

hai us jagah pe raushnī charāg ke baġhair bhī

likkhī ga.ī haiñ jis ke saath zindagī kī manzileñ

vo aa milegā aadmī charāg ke baġhair bhī

masarratoñ ke qāfile luTā rahī hai phir mujhe

tirī ye ḳhud-supurdagī charāg ke baġhair bhī

maiñ tazkira karūñ to kyā karūñ jamāl-e-yār kā

damak rahī thī dilkashī charāg ke baġhair bhī

tumhārī ek yaad be-shumār hasratoñ ke rañg

nigāh meñ sajā ga.ī charāg ke baġhair bhī

gila kisī se kyuuñ karūñ guzar hī jā.egī 'ḳhayāl'

ye muḳhtasar sī zindagī charāg ke baġhair bhī

ye baat munkashif hui charag ke baghair bhi

main DhunD lunga har KHushi charag ke baghair bhi

hua tha jis jagah kabhi visal-e-yar dosto

hai us jagah pe raushni charag ke baghair bhi

likkhi gai hain jis ke sath zindagi ki manzilen

wo aa milega aadmi charag ke baghair bhi

masarraton ke qafile luTa rahi hai phir mujhe

teri ye KHud-supurdagi charag ke baghair bhi

main tazkira karun to kya karun jamal-e-yar ka

damak rahi thi dilkashi charag ke baghair bhi

tumhaari ek yaad be-shumar hasraton ke rang

nigah mein saja gai charag ke baghair bhi

gila kisi se kyun karun guzar hi jaegi 'KHayal'

ye muKHtasar si zindagi charag ke baghair bhi