ye baat sach hai dabangon ke sath kaTi hai

ye baat sach hai dabangoñ ke saath kaaTī hai

ik 'umr maiñ ne malangoñ ke saath kaaTī hai

sisaktī rotī umangoñ ke saath kaaTī hai

shab-e-firāq patangoñ ke saath kaaTī hai

safedī phuuT paḌī hai to us pe ġham kaisā

tamām 'umr to rangoñ ke saath kaaTī hai

vo ek raat jo in'ām kī milī thī tujhe

use bhī tū ne lafangoñ ke saath kaaTī hai

tirī zabān kī ‘uryāniyāñ batātī haiñ

ki ziist tū ne bhī nangoñ ke saath kaaTī hai

jo merī jiit pe uTThī thī kal vahī uñglī

lagā ke shart patangoñ ke saath kaaTī hai

ye baat sach hai dabangon ke sath kaTi hai

ek 'umr main ne malangon ke sath kaTi hai

sisakti roti umangon ke sath kaTi hai

shab-e-firaq patangon ke sath kaTi hai

safedi phuT paDi hai to us pe gham kaisa

tamam 'umr to rangon ke sath kaTi hai

wo ek raat jo in'am ki mili thi tujhe

use bhi tu ne lafangon ke sath kaTi hai

teri zaban ki ‘uryaniyan batati hain

ki zist tu ne bhi nangon ke sath kaTi hai

jo meri jit pe uTThi thi kal wahi ungli

laga ke shart patangon ke sath kaTi hai