ye baat teri chashm-e-fusun-kar hi samjhe

ye baat tirī chashm-e-fusūñ-kār hī samjhe

sahrā bhī nazar aa.e to gulzār hī samjhe

ik baat jise sun ke hayā aa.e chaman ko

ik baat jise nargis-e-bīmār hī samjhe

is tarah dukāñ dil kī sajā.ūñ ki zamāna

dekhe to use misr kā bāzār hī samjhe

kyā shām-o-sahar us kī hai kyā us ke shab-o-roz

duniyā ko bhī jo kākul-o-ruḳhsār hī samjhe

kahtā hī rahā dil ki ye sahrā-e-junūñ hai

ham the ki use sāya-e-dīvār hī samjhe

vo bhī to chaman zaad the jo shāḳh-e-chaman ko

gardan pe laTaktī huī talvār hī samjhe

har chand thā dāman meñ liye vus.at-e-kaunain

is dil ko magar nuqta-e-parkār hī samjhe

zāhid ko bhalā kab thī yahāñ fursat-e-tafhīm

rahmat ko tirī tere gunahgār hī samjhe

vo haal 'razā' tum ne banā rakkhā hai dil kā

dekhe jo koī ishq kā āzār hī samjhe

ye baat teri chashm-e-fusun-kar hi samjhe

sahra bhi nazar aae to gulzar hi samjhe

ek baat jise sun ke haya aae chaman ko

ek baat jise nargis-e-bimar hi samjhe

is tarah dukan dil ki sajaun ki zamana

dekhe to use misr ka bazar hi samjhe

kya sham-o-sahar us ki hai kya us ke shab-o-roz

duniya ko bhi jo kakul-o-ruKHsar hi samjhe

kahta hi raha dil ki ye sahra-e-junun hai

hum the ki use saya-e-diwar hi samjhe

wo bhi to chaman zad the jo shaKH-e-chaman ko

gardan pe laTakti hui talwar hi samjhe

har chand tha daman mein liye wusat-e-kaunain

is dil ko magar nuqta-e-parkar hi samjhe

zahid ko bhala kab thi yahan fursat-e-tafhim

rahmat ko teri tere gunahgar hi samjhe

wo haal 'raza' tum ne bana rakkha hai dil ka

dekhe jo koi ishq ka aazar hi samjhe