ye bad-qimash jo ahal-e-ata bane hue hain

ye bad-qimāsh jo ahal-e-atā bane hue haiñ

bashar to ban nahīñ sakte ḳhudā bane hue haiñ

maiñ jāntā huuñ kuchh aise aziim logoñ ko

jo zulm sah ke sarāpā duā bane hue haiñ

vo mujh se haath chhuḌā le to kuchh ajab bhī nahīñ

use ḳhabar hai ki hālāt kyā bane hue haiñ

luḌhaktā jā.ūñ kahāñ tak maiñ saath saath un ke

mire sharīk-e-safar to havā bane hue haiñ

tū ḳhalvatoñ meñ unheñ dekh le to Dar jaa.e

ye jitne log yahāñ pārsā bane hue haiñ

kabhī-kabhār to aisā gumāñ guzartā hai

hamāre haath ke arz-o-samā bane hue haiñ

hamīñ se ho ke pahuñchnā hai tum ko manzil tak

guzar bhī jaanā ki ham rāstā bane hue haiñ

hazāroñ log bichhaḌte rahe haiñ mil mil kar

so zindagī meñ bahut se ḳhalā bane hue haiñ

kisī se mil ke bane the jo zard lamhoñ meñ

vo sabz-ḳhvāb mirā aasrā bane hue haiñ

ye bad-qimash jo ahal-e-ata bane hue hain

bashar to ban nahin sakte KHuda bane hue hain

main jaanta hun kuchh aise azim logon ko

jo zulm sah ke sarapa dua bane hue hain

wo mujh se hath chhuDa le to kuchh ajab bhi nahin

use KHabar hai ki haalat kya bane hue hain

luDhakta jaun kahan tak main sath sath un ke

mere sharik-e-safar to hawa bane hue hain

tu KHalwaton mein unhen dekh le to Dar jae

ye jitne log yahan parsa bane hue hain

kabhi-kabhaar to aisa guman guzarta hai

hamare hath ke arz-o-sama bane hue hain

hamin se ho ke pahunchna hai tum ko manzil tak

guzar bhi jaana ki hum rasta bane hue hain

hazaron log bichhaDte rahe hain mil mil kar

so zindagi mein bahut se KHala bane hue hain

kisi se mil ke bane the jo zard lamhon mein

wo sabz-KHwab mera aasra bane hue hain