ye bahaaren ye chaman ye aashiyan mere liye

ye bahāreñ ye chaman ye āshiyāñ mere liye

sar-ba-sar sābit hue āzār-e-jāñ mere liye

pūchhte kyā ho dil-e-be-ḳhānamāñ kī dosto

ik musībat hai dil-e-be-ḳhānamāñ mere liye

ab tabī.at mushkiloñ se is qadar mānūs hai

fasl-e-gul se kam nahīñ daur-e-ḳhizāñ mere liye

chal diyā jab nāḳhudā tūfāñ meñ mujh ko chhoḌ kar

ban ga.ī sāhil har ik mauj-e-ravāñ mere liye

kaun sī hai vo musībat mujh pe jo TuuTī nahīñ

rāt-din gardish meñ haiñ haft āsmāñ mere liye

laakh huuñ be-vasf lekin muddatoñ yaad ā.ūñgā

muddatoñ duniyā rahegī nauha-ḳhvāñ mere liye

maiñ ne 'āsī' tark kar dī zindagī ye soch kar

kyoñ sahe ye har balā-e-nā-gahāñ mere liye

ye bahaaren ye chaman ye aashiyan mere liye

sar-ba-sar sabit hue aazar-e-jaan mere liye

puchhte kya ho dil-e-be-KHanaman ki dosto

ek musibat hai dil-e-be-KHanaman mere liye

ab tabiat mushkilon se is qadar manus hai

fasl-e-gul se kam nahin daur-e-KHizan mere liye

chal diya jab naKHuda tufan mein mujh ko chhoD kar

ban gai sahil har ek mauj-e-rawan mere liye

kaun si hai wo musibat mujh pe jo TuTi nahin

raat-din gardish mein hain haft aasman mere liye

lakh hun be-wasf lekin muddaton yaad aaunga

muddaton duniya rahegi nauha-KHwan mere liye

main ne 'asi' tark kar di zindagi ye soch kar

kyon sahe ye har bala-e-na-gahan mere liye