ye ban-sanwar ke meri sadgi mein lauT aae

ye ban-sañvar ke mirī sādgī meñ lauT aa.e

mire ḳhayāl mirī shā.irī meñ lauT aa.e

use kaho ki mirī zaat ab bhī baaqī hai

diyā bujhā de mirī raushnī meñ lauT aa.e

vo jis tarah se parinde shajar pe lauTte haiñ

ham apne aap se nikle tujhī meñ lauT aa.e

jo maiñ hañsūñ to mirā ashk ban ke vo chhalke

kisī tarah se vo merī hañsī meñ lauT aa.e

ḳhushī milī bhī to ham ko kabhī na raas i

udāsiyoñ ke sabab is ḳhushī meñ lauT aa.e

phisaltī ret sā hāthoñ se gir gayā thā jo

vo guzrā vaqt kabhī phir ghaḌī meñ lauT aa.e

hameñ to ek hī chehre kā kaam hotā hai

haTā ke bhiiḌ ko ham phir usī meñ lauT aa.e

baḌe ġhurūr se nikle the alvidā.a kah kar

bas ek baar pukārā galī meñ lauT aa.e

ye ban-sanwar ke meri sadgi mein lauT aae

mere KHayal meri shairi mein lauT aae

use kaho ki meri zat ab bhi baqi hai

diya bujha de meri raushni mein lauT aae

wo jis tarah se parinde shajar pe lauTte hain

hum apne aap se nikle tujhi mein lauT aae

jo main hansun to mera ashk ban ke wo chhalke

kisi tarah se wo meri hansi mein lauT aae

KHushi mili bhi to hum ko kabhi na ras i

udasiyon ke sabab is KHushi mein lauT aae

phisalti ret sa hathon se gir gaya tha jo

wo guzra waqt kabhi phir ghaDi mein lauT aae

hamein to ek hi chehre ka kaam hota hai

haTa ke bhiD ko hum phir usi mein lauT aae

baDe ghurur se nikle the alwidaa kah kar

bas ek bar pukara gali mein lauT aae