ye bata de mujhko mere dil kise aawaz dun

ye batā de mujh ko mere dil kise āvāz duuñ

ḳhud masīhā hai mirā qātil kise āvāz duuñ

jitne saaqī the mire sab nazr-e-tūfāñ ho ga.e

aur kosoñ duur hai sāhil kise āvāz duuñ

le gayā vo saath apne gulshan-e-dil kī bahār

suunī suunī hai mirī mahfil kise āvāz duuñ

haal merā ḳhanjar-e-māzī se zaḳhmī ho gayā

ro rahā hai merā mustaqbil kise āvāz duuñ

vo chalātā hai ajab andāz se tīr-e-nazar

aur meñ ho jaatā huuñ bismil kise āvāz duuñ

kaun hai mushkil-kushā merā qabā tere sivā

jab paḌe mujh par koī mushkil kise āvāz duuñ

jaañ nichhāvar kar rahā thā mujh pe jo 'afzal' kabhī

dushmanoñ meñ vo bhī hai shāmil kise āvāz duuñ

ye bata de mujh ko mere dil kise aawaz dun

KHud masiha hai mera qatil kise aawaz dun

jitne saqi the mere sab nazr-e-tufan ho gae

aur koson dur hai sahil kise aawaz dun

le gaya wo sath apne gulshan-e-dil ki bahaar

suni suni hai meri mahfil kise aawaz dun

haal mera KHanjar-e-mazi se zaKHmi ho gaya

ro raha hai mera mustaqbil kise aawaz dun

wo chalata hai ajab andaz se tir-e-nazar

aur mein ho jata hun bismil kise aawaz dun

kaun hai mushkil-kusha mera qaba tere siwa

jab paDe mujh par koi mushkil kise aawaz dun

jaan nichhawar kar raha tha mujh pe jo 'afzal' kabhi

dushmanon mein wo bhi hai shamil kise aawaz dun