ye be-dili hai to kashti se yar kya utren

ye be-dilī hai to kashtī se yaar kyā utreñ

udhar bhī kaun hai dariyā ke paar kyā utreñ

tamām daulat-e-jāñ haar dī mohabbat meñ

jo zindagī se liye the udhār kyā utreñ

hazār jaam se Takrā ke jaam ḳhālī hoñ

jo aa ga.e haiñ diloñ meñ ġhubār kyā utreñ

basān-e-ḳhāk sar-e-kū-e-yār baiThe haiñ

ab is maqām se ham ḳhāksār kyā utreñ

na itr o uud na jaam o subū na saaz o surūr

faqīr-e-shahr ke ghar shahryār kyā utreñ

hameñ majāl nahīñ hai ki baam tak pahuñcheñ

unheñ ye aar sar-e-rahguzār kyā utreñ

jo zaḳhm daaġh bane haiñ vo bhar ga.e the 'farāz'

jo daaġh zaḳhm bane haiñ vo yaar kyā utreñ

ye be-dili hai to kashti se yar kya utren

udhar bhi kaun hai dariya ke par kya utren

tamam daulat-e-jaan haar di mohabbat mein

jo zindagi se liye the udhaar kya utren

hazar jam se Takra ke jam KHali hon

jo aa gae hain dilon mein ghubar kya utren

basan-e-KHak sar-e-ku-e-yar baiThe hain

ab is maqam se hum KHaksar kya utren

na itr o ud na jam o subu na saz o surur

faqir-e-shahr ke ghar shahryar kya utren

hamein majal nahin hai ki baam tak pahunchen

unhen ye aar sar-e-rahguzar kya utren

jo zaKHm dagh bane hain wo bhar gae the 'faraaz'

jo dagh zaKHm bane hain wo yar kya utren