ye bhi nahin ki baala-o-bartar nahin hun main

ye bhī nahīñ ki bālā-o-bartar nahīñ huuñ maiñ

maanā ki musht-e-ḳhāk se baḌh kar nahīñ huuñ maiñ

kaafī hai ik kiran bhī miTāne ke vāste

shabnam huuñ barg-e-gul pe samundar nahīñ huuñ maiñ

kyoñ kar qafas meñ mujh ko na aa.e chaman kī yaad

be-bāl-o-par zarūr huuñ be-ghar nahīñ huuñ maiñ

zulm-o-sitam kī saarī hadeñ paar kar gayā

phir bhī vo kah rahā hai sitamgar nahīñ huuñ maiñ

koh-e-ġham-o-alam ko kiyā maiñ ne paash paash

yuuñ dekhiye to āhan-o-patthar nahīñ huuñ maiñ

maiñ terā ek partav-e-fānī jahāñ meñ huuñ

goyā ye tai hai utnā bhī kamtar nahīñ huuñ maiñ

tārīk rāstoñ meñ kahā rāhbar ne 'nāz'

azm-e-safar ke nuur se baḌh kar nahīñ huuñ maiñ

ye bhi nahin ki baala-o-bartar nahin hun main

mana ki musht-e-KHak se baDh kar nahin hun main

kafi hai ek kiran bhi miTane ke waste

shabnam hun barg-e-gul pe samundar nahin hun main

kyon kar qafas mein mujh ko na aae chaman ki yaad

be-baal-o-par zarur hun be-ghar nahin hun main

zulm-o-sitam ki sari haden par kar gaya

phir bhi wo kah raha hai sitamgar nahin hun main

koh-e-gham-o-alam ko kiya main ne pash pash

yun dekhiye to aahan-o-patthar nahin hun main

main tera ek partaw-e-fani jahan mein hun

goya ye tai hai utna bhi kamtar nahin hun main

tarik raston mein kaha rahbar ne 'naz'

azm-e-safar ke nur se baDh kar nahin hun main