یہ بھی روش کیا خوب ہے سچی خوشی کے واسطے

یہ بھی روش کیا خوب ہے سچی خوشی کے واسطے

جینا کسی کے واسطے مرنا کسی کے واسطے

لازم ہیں دور اندیشیاں اک فلسفی کے واسطے

فکر و نظر درکار ہیں دانشوری کے واسطے

جب تک نہ ہو عرفان ذات ادراک عالم کچھ نہیں

یا رب بصیرت کر عطا خود آگہی کے واسطے

اہل خرد سے حل نہ ہوں گے زندگی کے مسئلے

اہل جنوں کو ڈھونڈ اس درد سری کے واسطے

ہوتے رہو گے تا بہ کے شرمندۂ احسان غیر

یارو یہاں کی چند روزہ زندگی کے واسطے

دونوں ہیں افسردہ دل آزردہ نظر آشفتہ حال

اک بے خودی کے واسطے اور اک خودی کے واسطے

کس درجہ پر اسرار ہوتا جا رہا ہے ان دنوں

اک مسئلہ ہے آدمی خود آدمی کے واسطے

مجھ کو کسی کی ذات سے کیا لینا دینا ہے مگر

کوشاں ہوں میں تو اتحاد باہمی کے واسطے

رہبرؔ نہ ہوگا شبنم افشانی سے بار آور یہ باغ

خون جگر کی ہے ضرورت شاعری کے واسطے