ye bole jo un ko kaha be-murawwat

ye bole jo un ko kahā be-muravvat

maiñ kyā tum se bhī huuñ sivā be-muravvat

laqab mere qātil ke kyā pūchhte ho

sitamgār nā-āshnā be-muravvat

un ā.īna-rūyoñ meñ hai vo sitamgar

baḌā ḳhud-ġharaz ḳhud-numā be-muravvat

tū vo kaj-adā hai jo duniyā meñ DhūñDheñ

na tujh sā mile dūsrā be-muravvat

nahīñ us meñ rahm-o-hayā kuchh vo qātil

baḌā sañg-dil hai baḌā be-muravvat

tirī chashm-poshī se āñkhoñ meñ dam hai

idhar dekh o bevafā be-muravvat

sivā tere saare hasīnoñ ko dekhā

ḳhunuk be-namak be-mazā be-muravvat

gilā jaur kā sun ke bole tumheñ kyā

maiñ ahl-e-muravvat huuñ yā be-muravvat

jafāoñ kā us se gilā kījiye jab

tū kahtā hai vo bevafā be-muravvat

chalo DhūñDh lo bā-vafā aur koī

agar maiñ huuñ nā-āshnā be-muravvat

'qalaq' uTh ga.ī rasm-e-ulfat jahāñ se

hasīñ sab haiñ duniyā ke kyā be-muravvat

ye bole jo un ko kaha be-murawwat

main kya tum se bhi hun siwa be-murawwat

laqab mere qatil ke kya puchhte ho

sitamgar na-ashna be-murawwat

un aaina-ruyon mein hai wo sitamgar

baDa KHud-gharaz KHud-numa be-murawwat

tu wo kaj-ada hai jo duniya mein DhunDhen

na tujh sa mile dusra be-murawwat

nahin us mein rahm-o-haya kuchh wo qatil

baDa sang-dil hai baDa be-murawwat

teri chashm-poshi se aankhon mein dam hai

idhar dekh o bewafa be-murawwat

siwa tere sare hasinon ko dekha

KHunuk be-namak be-maza be-murawwat

gila jaur ka sun ke bole tumhein kya

main ahl-e-murawwat hun ya be-murawwat

jafaon ka us se gila kijiye jab

tu kahta hai wo bewafa be-murawwat

chalo DhunDh lo ba-wafa aur koi

agar main hun na-ashna be-murawwat

'qalaq' uTh gai rasm-e-ulfat jahan se

hasin sab hain duniya ke kya be-murawwat