ye chamak dhul mein tahlil bhi ho sakti hai

ye chamak dhuul meñ tahlīl bhī ho saktī hai

kā.enāt ik na.ī tashkīl bhī ho saktī hai

tum na samjhoge koī aur samajh legā ise

ḳhāmushī dard kī tarsīl bhī ho saktī hai

kuchh sambhal kar raho un saada mulāqātoñ meñ

dostī ishq meñ tabdīl bhī ho saktī hai

maiñ adhūrā huuñ magar ḳhud ko adhūrā na samajh

mujh se mil kar tirī takmīl bhī ho saktī hai

kāTnā raat kā āsān bhī ho saktā hai

dil meñ ik yaad kī qindīl bhī ho saktī hai

is qadar bhī na baḌho dāman-e-dil kī jānib

ye mohabbat koī tamsīl bhī ho saktī hai

haañ dil-o-jān fidā karda 'zahīr' us pe magar

ye bhī imkān hai tazlīl bhī ho saktī hai

ye chamak dhul mein tahlil bhi ho sakti hai

kaenat ek nai tashkil bhi ho sakti hai

tum na samjhoge koi aur samajh lega ise

KHamushi dard ki tarsil bhi ho sakti hai

kuchh sambhal kar raho un sada mulaqaton mein

dosti ishq mein tabdil bhi ho sakti hai

main adhura hun magar KHud ko adhura na samajh

mujh se mil kar teri takmil bhi ho sakti hai

kaTna raat ka aasan bhi ho sakta hai

dil mein ek yaad ki qindil bhi ho sakti hai

is qadar bhi na baDho daman-e-dil ki jaanib

ye mohabbat koi tamsil bhi ho sakti hai

han dil-o-jaan fida karda 'zahir' us pe magar

ye bhi imkan hai tazlil bhi ho sakti hai