ye chhapke ka jo baala kan mein ab tumne Dala hai

ye chhapke kā jo baalā kaan meñ ab tum ne Daalā hai

isī baale kī daulat se tumhārā bol-bālā hai

nazākat sar se paañv tak paḌī qurbān hotī hai

ilāhī us badan ko tū ne kis sāñche meñ Dhālā hai

ye dil kyūñkar nigah se us kī chhidte haiñ maiñ hairāñ huuñ

na ḳhanjar hai na nashtar hai na jamdhar hai na bhālā hai

balā.eñ naag kaale nāgineñ aur saañp ke bachche

ḳhudā jaane ki is juuḌe meñ kyā kyā bāñdh Daalā hai

na ġhol aatā hai ḳhūbāñ kā sarak ai dil maiñ kahtā huuñ

ye kampū kī nahīñ palTan ye pariyoñ kā risālā hai

jise tum le ke bedardī se paañv meñ kuchalte ho

ye dil maiñ ne to ai sāhab baḌī mehnat se paalā hai

'nazīr' ik aur likh aisī ġhazal jo sun ke jī ḳhush ho

arī is Dhab kī bātoñ ne to dil meñ shor Daalā hai

ye chhapke ka jo baala kan mein ab tum ne Dala hai

isi baale ki daulat se tumhaara bol-baala hai

nazakat sar se panw tak paDi qurban hoti hai

ilahi us badan ko tu ne kis sanche mein Dhaala hai

ye dil kyunkar nigah se us ki chhidte hain main hairan hun

na KHanjar hai na nashtar hai na jamdhar hai na bhaala hai

balaen nag kale naginen aur sanp ke bachche

KHuda jaane ki is juDe mein kya kya bandh Dala hai

na ghol aata hai KHuban ka sarak ai dil main kahta hun

ye kampu ki nahin palTan ye pariyon ka risala hai

jise tum le ke bedardi se panw mein kuchalte ho

ye dil main ne to ai sahab baDi mehnat se pala hai

'nazir' ek aur likh aisi ghazal jo sun ke ji KHush ho

ari is Dhab ki baaton ne to dil mein shor Dala hai