ye dard rahe dil mein ye zaKHm-e-wafa rakhna

ye dard rahe dil meñ ye zaḳhm-e-vafā rakhnā

allāh mohabbat kī khetī ko harā rakhnā

dastak bhī na de koī aur ghar meñ chalā aa.e

is tarah na tum dil kā darvāza khulā rakhnā

uljhegī to phir gutthī suljhā.e na suljhegī

jo bahs chhiḌe us kā qabze meñ sirā rakhnā

kartīñ bhī havā.eñ kyā fitrat ke munāfī thā

raushan kisī muflis kī kuTiyā meñ diyā rakhnā

maiñ ziist ke ḳhāke meñ bhar dūñgā lahū se rang

tum phuul se hāthoñ par tahrīr-e-hinā rakhnā

jis ne saf-e-bātil kī āñkheñ na chamakne diiñ

surme kī jagah us kī ḳhāk-e-kaf-e-pā rakhnā

'mas.ūd' ke hoñToñ par shikva na tirā aa.e

jis haal meñ bhī rakhnā rāzī-ba-razā rakhnā

ye dard rahe dil mein ye zaKHm-e-wafa rakhna

allah mohabbat ki kheti ko hara rakhna

dastak bhi na de koi aur ghar mein chala aae

is tarah na tum dil ka darwaza khula rakhna

uljhegi to phir gutthi suljhae na suljhegi

jo bahs chhiDe us ka qabze mein sira rakhna

kartin bhi hawaen kya fitrat ke munafi tha

raushan kisi muflis ki kuTiya mein diya rakhna

main zist ke KHake mein bhar dunga lahu se rang

tum phul se hathon par tahrir-e-hina rakhna

jis ne saf-e-baatil ki aankhen na chamakne din

surme ki jagah us ki KHak-e-kaf-e-pa rakhna

'masud' ke honTon par shikwa na tera aae

jis haal mein bhi rakhna raazi-ba-raza rakhna