ye dasht-o-daman koh o kamar kis ke liye hai

ye dasht-o-daman koh o kamar kis ke liye hai

har lamha zamīñ garm-e-safar kis ke liye hai

kis kis ke muqābil hai mirī quvvat-e-bāzū

biphrī huī maujoñ meñ bhañvar kis ke liye hai

jā jā ke palaT aate haiñ kis ke liye mausam

ye shaam shafaq raat sahar kis ke liye hai

haiñ kis ke ta.alluq se mirī aañkh meñ aañsū

muTThī meñ sadaf kī ye guhar kis ke liye hai

alfāz haiñ mafhūm se labrez to kyuuñ haiñ

gar hai to duāoñ meñ asar kis ke liye hai

be-nīnd guzar jaatī haiñ kis ke liye rāteñ

ye kāvish-e-fan arz-e-hunar kis ke liye hai

kis ke liye Dhaltī haiñ mirī fikr kī shāmeñ

ye qalb-e-hazīñ dīda-e-tar kis ke liye hai

uThtā hai savāloñ se savāloñ kā dhundalkā

sab us ke liye hai vo magar kis ke liye hai

ye dasht-o-daman koh o kamar kis ke liye hai

har lamha zamin garm-e-safar kis ke liye hai

kis kis ke muqabil hai meri quwwat-e-bazu

biphri hui maujon mein bhanwar kis ke liye hai

ja ja ke palaT aate hain kis ke liye mausam

ye sham shafaq raat sahar kis ke liye hai

hain kis ke talluq se meri aankh mein aansu

muTThi mein sadaf ki ye guhar kis ke liye hai

alfaz hain mafhum se labrez to kyun hain

gar hai to duaon mein asar kis ke liye hai

be-nind guzar jati hain kis ke liye raaten

ye kawish-e-fan arz-e-hunar kis ke liye hai

kis ke liye Dhalti hain meri fikr ki shamen

ye qalb-e-hazin dida-e-tar kis ke liye hai

uThta hai sawalon se sawalon ka dhundalka

sab us ke liye hai wo magar kis ke liye hai