ye daur-e-ahl-e-hawas hai karam se kaam na le

ye daur-e-ahl-e-havas hai karam se kaam na le

jafā se kaam le zālim vafā kā naam na le

gila sitam kā nahīñ mujh ko sirf ḳhauf ye hai

zamāna tujh se kahīñ merā intiqām na le

zamāna us ko mirī yaad ḳhud dilā degā

vo laakh mujh ko bhulā de vo merā naam na le

maza to jab hai ki ai sabr-o-zabt-e-ishq ik din

vo ḳhud salām kare jo mirā salām na le

na kar zarā bhī tavajjoh ḳhatā-e-dushman par

ik intiqām hai ye bhī ki intiqām na le

dil-e-tabāh jo honā thā vo to ho hī gayā

zamāna kuchh bhī kahe tū to un kā naam na le

vo kyā nigāh jo marhūn-e-jām hī rakkhe

vo haath kyā hai jo girte huoñ ko thaam na le

tirī nigāh se pī le jo ek baar ai dost

tamām umr vo phir mai-kashī kā naam na le

usī ke dar pe jhukā.e raheñge sar ko 'shamīm'

ye dekhnā hai vo kab tak karam se kaam na le

ye daur-e-ahl-e-hawas hai karam se kaam na le

jafa se kaam le zalim wafa ka nam na le

gila sitam ka nahin mujh ko sirf KHauf ye hai

zamana tujh se kahin mera intiqam na le

zamana us ko meri yaad KHud dila dega

wo lakh mujh ko bhula de wo mera nam na le

maza to jab hai ki ai sabr-o-zabt-e-ishq ek din

wo KHud salam kare jo mera salam na le

na kar zara bhi tawajjoh KHata-e-dushman par

ek intiqam hai ye bhi ki intiqam na le

dil-e-tabah jo hona tha wo to ho hi gaya

zamana kuchh bhi kahe tu to un ka nam na le

wo kya nigah jo marhun-e-jam hi rakkhe

wo hath kya hai jo girte huon ko tham na le

teri nigah se pi le jo ek bar ai dost

tamam umr wo phir mai-kashi ka nam na le

usi ke dar pe jhukae rahenge sar ko 'shamim'

ye dekhna hai wo kab tak karam se kaam na le