ye daur-e-KHirad hai daur-e-junun is daur mein jina mushkil hai

ye daur-e-ḳhirad hai daur-e-junūñ is daur meñ jiinā mushkil hai

añgūr kī mai ke dhoke meñ zahrāb kā piinā mushkil hai

jab nāḳhun-e-vahshat chalte the roke se kisī ke ruk na sake

ab chāk-e-dil-e-insāniyyat siite haiñ to siinā mushkil hai

ik sabr ke ghūñT se miT jaatī tab tishna-laboñ kī tishna-labī

kam-zarfi-e-duniyā ke sadqe ye ghūñT bhī piinā mushkil hai

vo sho.ala nahīñ jo bujh jaa.e āñdhī ke ek hī jhoñke se

bujhne kā salīqa āsāñ hai jalne kā qarīna mushkil hai

karne ko rafū kar hī leñge duniyā vaale sab zaḳhm apne

jo zaḳhm dil-e-insāñ pe lagā us zaḳhm kā siina mushkil hai

vo mard nahīñ jo Dar jaa.e māhaul ke ḳhūnī manzar se

is haal meñ jiinā lāzim hai jis haal meñ jiinā mushkil hai

milne ko milegā bil-āḳhir ai 'arsh' sukūn-e-sāhil bhī

tūfān-e-havādis se lekin bach jaa.e safīna mushkil hai

ye daur-e-KHirad hai daur-e-junun is daur mein jina mushkil hai

angur ki mai ke dhoke mein zahrab ka pina mushkil hai

jab naKHun-e-wahshat chalte the roke se kisi ke ruk na sake

ab chaak-e-dil-e-insaniyyat site hain to sina mushkil hai

ek sabr ke ghunT se miT jati tab tishna-labon ki tishna-labi

kam-zarfi-e-duniya ke sadqe ye ghunT bhi pina mushkil hai

wo shoala nahin jo bujh jae aandhi ke ek hi jhonke se

bujhne ka saliqa aasan hai jalne ka qarina mushkil hai

karne ko rafu kar hi lenge duniya wale sab zaKHm apne

jo zaKHm dil-e-insan pe laga us zaKHm ka sina mushkil hai

wo mard nahin jo Dar jae mahaul ke KHuni manzar se

is haal mein jina lazim hai jis haal mein jina mushkil hai

milne ko milega bil-aKHir ai 'arsh' sukun-e-sahil bhi

tufan-e-hawadis se lekin bach jae safina mushkil hai