یہ دھنک یہ شفق یہ مہ و مہر کے راستے

یہ دھنک یہ شفق یہ مہ و مہر کے راستے

ان سے بھی کچھ حسیں تر ترے شہر کے راستے

یاد ہے آج تک ہجر کی وہ شب اولیں

وادیاں وہ قیامت کی وہ قہر کے راستے

ذہن میں یک بہ یک تیری یادوں کے پٹ کھل گئے

تنگ ہونے لگے مجھ پہ جب دہر کے راستے

اک ہوا کے تھپیڑے نے ایسا اچھالا کہ بس

تھے جو پر شور دریاؤں میں لہر کے راستے

اے سیہ سانپ شب مجھ کو ڈسنا پہ یہ سوچ لے

لوگ امرت بھی پیتے رہے زہر کے راستے

فکر اپنی بھی جوئے رواں ہے مگر اس طرح

جیسے سنسان صحراؤں میں نہر کے راستے

کچھ دنوں سے تمہیں آخر افسرؔ یہ کیا ہو گیا

بھول جاتے ہو تم اپنے ہی شہر کے راستے