ye dhoka ho na ho ummid hi malum hoti hai

ye dhokā ho na ho ummīd hī ma.alūm hotī hai

ki mujh ko duur se kuchh raushnī ma.alūm hotī hai

ḳhudā jaane kis andāz-e-nazar se tum ne dekhā hai

ki mujh ko zindagī ab zindagī ma.alūm hotī hai

isī kā naam shāyad zindagī ne yaas rakkhā hai

nafas kī jo khaTak hai āḳhirī ma.alūm hotī hai

huā hai husn se kuchh aur aks-e-husn-e-ḳhud-dārī

ḳhamoshī un ke hoñToñ par hañsī ma.alūm hotī hai

na aayā haath mere baḌh ke jo dāman ināyat kā

ye mahrūmī talab kī kuchh kamī ma.alūm hotī hai

jhukāyā aaj dar par ai zahe baḳht-e-sar-afrāzī

tirī rahmat qubūl-e-bandagī ma.alūm hotī hai

tujhe apne liye dast-e-karam ye jāntā huuñ maiñ

ki tū hai jis qadar duniyā vahī ma.alūm hotī hai

kahāñ huuñ kis taraf huuñ maiñ ḳhabar is kī nahīñ mujh ko

yahī gum-gashtagī kuchh āgahī ma.alūm hotī hai

sar-e-mauj nafas kashtī-e-dil ko kyā kahūñ 'kaifī'

ubhartī hai jahāñ tak Dūbtī ma.alūm hotī hai

ye dhoka ho na ho ummid hi malum hoti hai

ki mujh ko dur se kuchh raushni malum hoti hai

KHuda jaane kis andaz-e-nazar se tum ne dekha hai

ki mujh ko zindagi ab zindagi malum hoti hai

isi ka nam shayad zindagi ne yas rakkha hai

nafas ki jo khaTak hai aaKHiri malum hoti hai

hua hai husn se kuchh aur aks-e-husn-e-KHud-dari

KHamoshi un ke honTon par hansi malum hoti hai

na aaya hath mere baDh ke jo daman inayat ka

ye mahrumi talab ki kuchh kami malum hoti hai

jhukaya aaj dar par ai zahe baKHt-e-sar-afraazi

teri rahmat qubul-e-bandagi malum hoti hai

tujhe apne liye dast-e-karam ye jaanta hun main

ki tu hai jis qadar duniya wahi malum hoti hai

kahan hun kis taraf hun main KHabar is ki nahin mujh ko

yahi gum-gashtagi kuchh aagahi malum hoti hai

sar-e-mauj nafas kashti-e-dil ko kya kahun 'kaifi'

ubharti hai jahan tak Dubti malum hoti hai