ye dhoka ho na ho ummid hi malum hoti hai

ye dhokā ho na ho ummīd hī mālūm hotī hai

ki mujh ko duur se kuchh raushnī mālūm hotī hai

ḳhudā jaane kis andāz-e-nazar se tum ne dekhā hai

ki mujh ko zindagī ab zindagī mālūm hotī hai

isī kā naam shāyad zindagī ne yaas rakhā hai

nafas kī jo khaTak hai āḳhirī mālūm hotī

huā hai husn se kuchh aur aks-e-husn-e-ḳhuddārī

ḳhamoshī un ke hoñToñ par hañsī mālūm hotī hai

na aayā haath mere baḌh ke jo dāman ināyat kā

ye mahrūmī talab kī kuchh kamī mālūm hotī hai

jhukāyā aaj dar par ai zahe baḳht-e-sar-afrāzī

tirī rahmat qubūl-e-bandagī mālūm hotī hai

tujhe apne liye dast-e-karam ye jāntā huuñ maiñ

ki tū hai jis qadar duniyā vahī mālūm hotī hai

kahāñ huuñ kis taraf huuñ maiñ ḳhabar is kī nahīñ mujh ko

yahī gum-gashtagī kuchh āgahī mālūm hotī hai

sar-e-mauj-e-nafas kashti-e-dil ko kyā kahūñ 'kaifī'

ubhartī hai jahāñ tak Dūbtī ma.alūm hotī hai

ye dhoka ho na ho ummid hi malum hoti hai

ki mujh ko dur se kuchh raushni malum hoti hai

KHuda jaane kis andaz-e-nazar se tum ne dekha hai

ki mujh ko zindagi ab zindagi malum hoti hai

isi ka nam shayad zindagi ne yas rakha hai

nafas ki jo khaTak hai aaKHiri malum hoti

hua hai husn se kuchh aur aks-e-husn-e-KHuddari

KHamoshi un ke honTon par hansi malum hoti hai

na aaya hath mere baDh ke jo daman inayat ka

ye mahrumi talab ki kuchh kami malum hoti hai

jhukaya aaj dar par ai zahe baKHt-e-sar-afraazi

teri rahmat qubul-e-bandagi malum hoti hai

tujhe apne liye dast-e-karam ye jaanta hun main

ki tu hai jis qadar duniya wahi malum hoti hai

kahan hun kis taraf hun main KHabar is ki nahin mujh ko

yahi gum-gashtagi kuchh aagahi malum hoti hai

sar-e-mauj-e-nafas kashti-e-dil ko kya kahun 'kaifi'

ubharti hai jahan tak Dubti malum hoti hai