ye dil hai to aafat mein paDte rahenge

ye dil hai to aafat meñ paḌte raheñge

yuuñ hī eḌiyāñ ham ragaḌte raheñge

mohabbat hai bad-nām kyuuñ kar banegī

vo ham se hamesha bigaḌte raheñge

agar ishq rakhtā hai to aql kho de

ye donoñ raheñge to laḌte raheñge

bure din burī sā.ateñ ishq meñ haiñ

sab ahbāb ham se bichhaḌte raheñge

vo sar kaaT Dāleñ hamārā to kyā ġham

ġharaz aise hī paañv paḌte raheñge

kahīñ āshiqoñ kā Thikānā nahīñ hai

zamāne meñ bastī ujaḌte raheñge

junūñ ne tamāshā banāyā hai ham ko

darīchoñ ke parde udhaḌte raheñge

kabhī zulf se ho sakeñge na sar-bar

isī pech se ham pichhaḌte raheñge

na ḳhat bhejnā ham se mauqūf hogā

kabūtar kī shah par ukhaḌte raheñge

jo kuchh ham ne chāhā unhoñ ne na chāhā

ham is mas.ale meñ jhagaḌte raheñge

ġham-o-dard zevar hai ham āshiqoñ kā

nagīñ daaġh ke dil meñ jaḌte raheñge

qadam mai-kade se na niklegā bāhar

yahīñ nashshe meñ girte-paḌte raheñge

judā.ī meñ ai 'bahr' marnā bhalā hai

jiyeñge to ḳhiffat se gaḌte raheñge

ye dil hai to aafat mein paDte rahenge

yun hi eDiyan hum ragaDte rahenge

mohabbat hai bad-nam kyun kar banegi

wo hum se hamesha bigaDte rahenge

agar ishq rakhta hai to aql kho de

ye donon rahenge to laDte rahenge

bure din buri saaten ishq mein hain

sab ahbab hum se bichhaDte rahenge

wo sar kaT Dalen hamara to kya gham

gharaz aise hi panw paDte rahenge

kahin aashiqon ka Thikana nahin hai

zamane mein basti ujaDte rahenge

junun ne tamasha banaya hai hum ko

darichon ke parde udhaDte rahenge

kabhi zulf se ho sakenge na sar-bar

isi pech se hum pichhaDte rahenge

na KHat bhejna hum se mauquf hoga

kabutar ki shah par ukhaDte rahenge

jo kuchh hum ne chaha unhon ne na chaha

hum is masale mein jhagaDte rahenge

gham-o-dard zewar hai hum aashiqon ka

nagin dagh ke dil mein jaDte rahenge

qadam mai-kade se na niklega bahar

yahin nashshe mein girte-paDte rahenge

judai mein ai 'bahr' marna bhala hai

jiyenge to KHiffat se gaDte rahenge