ye dil jo paikar-e-sad-nur tha ab tirgi mein besh-o-kam milta hai mujhko

ye dil jo paikar-e-sad-nūr thā ab tīrgī meñ besh-o-kam miltā hai mujh ko

yahī vo Dūbtā bujhtā sitāra hai jo apnā ham-qadam miltā hai mujh ko

koī lamha nahīñ aatā tarab-zār-e-tamanna meñ lahaktā gungunātā

jise āvāz detā huuñ vo auroñ kī tarah mā.il-ba-ram miltā hai mujh ko

yūñhī ghuT ghuT ke jiine par mujhe uksā rahe haiñ dekhiye hālāt mere

maiñ jitnā ġham se bachnā chāhtā thā dosto utnā hī ġham miltā hai mujh ko

musalsal ek mahrūmī kā bādal hai jo kitne hī gharoñ par chhā gayā hai

ab un āñkhoñ kī qillat ho ga.ī hai jin meñ sairābī kā nam miltā hai mujh ko

hazāroñ phuul se paikar ma’āshī dhuup meñ kumhlā ga.e haiñ dekh liije

maiñ jis duniyā meñ rahtā huuñ vahāñ har shaḳhs ātish-dar-shikam miltā hai mujh ko

kisī kā ḳhush-tamāzat lams shab Dhalte hī lagtā hai adhūre ḳhvāb jaisā

'ajab ik sard sā mausam hai jo apne lahū meñ sub.h-dam miltā hai mujh ko

ye lagtā hai kisī ġhaflat-zada lamhe meñ mujh ko maar Dāleñge havādis

maiñ jin rastoñ meñ huuñ 'yāvar' vahāñ aksar halākat-ḳhez ḳham miltā hai mujh ko

ye dil jo paikar-e-sad-nur tha ab tirgi mein besh-o-kam milta hai mujh ko

yahi wo Dubta bujhta sitara hai jo apna ham-qadam milta hai mujh ko

koi lamha nahin aata tarab-zar-e-tamanna mein lahakta gungunata

jise aawaz deta hun wo auron ki tarah mail-ba-ram milta hai mujh ko

yunhi ghuT ghuT ke jine par mujhe uksa rahe hain dekhiye haalat mere

main jitna gham se bachna chahta tha dosto utna hi gham milta hai mujh ko

musalsal ek mahrumi ka baadal hai jo kitne hi gharon par chha gaya hai

ab un aankhon ki qillat ho gai hai jin mein sairabi ka nam milta hai mujh ko

hazaron phul se paikar ma’ashi dhup mein kumhla gae hain dekh lije

main jis duniya mein rahta hun wahan har shaKHs aatish-dar-shikam milta hai mujh ko

kisi ka KHush-tamazat lams shab Dhalte hi lagta hai adhure KHwab jaisa

'ajab ek sard sa mausam hai jo apne lahu mein subh-dam milta hai mujh ko

ye lagta hai kisi ghaflat-zada lamhe mein mujh ko mar Dalenge hawadis

main jin raston mein hun 'yawar' wahan aksar halakat-KHez KHam milta hai mujh ko