یہ دل کشی یہ نزاکت کہیں نہیں دیکھی

یہ دل کشی یہ نزاکت کہیں نہیں دیکھی

جہاں میں تجھ سی کوئی شے حسیں نہیں دیکھی

ہر ایک ذرہ یہاں کا ہے رشک شمس و قمر

دیار عشق سی ہم نے زمیں نہیں دیکھی

تمہارے دم ہی سے قائم تھی دل کشی اس کی

تمہارے بعد یہ دنیا حسیں نہیں دیکھی

ہماری توبہ کا کیا حشر ہو خدا جانے

گھٹا کچھ ایسی تو کیف آفریں نہیں دیکھی

ہر ایک بزم میں دیکھی ہے ہم نے قدر وفا

مگر یہ بات فقط اک یہیں نہیں دیکھی

کبھی تو بھولے سے اک بار ہاں بھی کہہ دیتے

تمہارے لب پہ ہمیشہ نہیں نہیں دیکھی

ہر اک گناہ میں لذت تو ہے مگر اے سحرؔ

گناہ عشق سی لذت کہیں نہیں دیکھی