ye dil-kashi ye nazakat kahin nahin dekhi

ye dil-kashī ye nazākat kahīñ nahīñ dekhī

jahāñ meñ tujh sī koī shai hasīñ nahīñ dekhī

har ek zarra yahāñ kā hai rashk-e-shams-o-qamar

dayār-e-ishq sī ham ne zamīñ nahīñ dekhī

tumhāre dam hī se qaa.em thī dilkashī is kī

tumhāre baad ye duniyā hasīñ nahīñ dekhī

hamārī tauba kā kyā hashr ho ḳhudā jaane

ghaTā kuchh aisī to kaif-āfrīñ nahīñ dekhī

har ek bazm meñ dekhī hai ham ne qadr-e-vafā

magar ye baat faqat ik yahīñ nahīñ dekhī

kabhī to bhūle se ik baar haañ bhī kah dete

tumhāre lab pe hamesha nahīñ nahīñ dekhī

har ik gunāh meñ lazzat to hai magar ai 'sehr'

gunāh-e-ishq sī lazzat kahīñ nahīñ dekhī

ye dil-kashi ye nazakat kahin nahin dekhi

jahan mein tujh si koi shai hasin nahin dekhi

har ek zarra yahan ka hai rashk-e-shams-o-qamar

dayar-e-ishq si hum ne zamin nahin dekhi

tumhaare dam hi se qaem thi dilkashi is ki

tumhaare baad ye duniya hasin nahin dekhi

hamari tauba ka kya hashr ho KHuda jaane

ghaTa kuchh aisi to kaif-afrin nahin dekhi

har ek bazm mein dekhi hai hum ne qadr-e-wafa

magar ye baat faqat ek yahin nahin dekhi

kabhi to bhule se ek bar han bhi kah dete

tumhaare lab pe hamesha nahin nahin dekhi

har ek gunah mein lazzat to hai magar ai 'sehr'

gunah-e-ishq si lazzat kahin nahin dekhi