ye duniya dur tak ka silsila nain

ye duniyā duur tak kā silsila na.iiñ

hameñ us ke liye kuchh sochnā na.iiñ

ye putlā is qadar maġhrūr kyuuñ hai

to kyā ye āsmānoñ se girā na.iiñ

bahut pahle ye din aane se pahle

jo honā thā abhī tak bhī huā na.iiñ

sabhī haq faisle ke muntazir haiñ

kisī ne ḳhuun kā badla liyā na.iiñ

abhī sūraj meñ thoḌī raushnī hai

zamīñ kā rang bhī phīkā paḌā na.iiñ

dar-o-dīvār ke me.amār dekheñ

ye ghar buniyād se ab bhī hilā na.iiñ

ye rasta shahr ke naqshe meñ hogā

ye rasta sirf āñkhoñ meñ khulā na.iiñ

ye duniyā is liye aadhī hai ab tak

piyāla dard se puurā bharā na.iiñ

vahī āñkheñ vahī chehra vahī baat

kisī tasvīr meñ kuchh bhī nayā na.iiñ

hameñ kuchh kaam karne haiñ yahāñ par

ye maanā kaam kā koī sila na.iiñ

usī ke mashvare ko mānte haiñ

ye dil jaisā bhī hai utnā burā na.iiñ

badan kī ḳhaak par chhīñTe lahū ke

kahāñ se aa.e haiñ ham ne kahā na.iiñ

musalsal rone vaale hañs rahe haiñ

ye koī chhoTā-moTā vāqi.a na.iiñ

kisī ke dukh kā charchā ho rahā hai

koī dukh aise dukh se to sivā na.iiñ

ye baat ik roz duniyā maan legī

hamāre jurm kī koī sazā na.iiñ

koī sotā nahīñ hai kyā sar-e-shām

koī bhī muñh añdhere jāgtā na.iiñ

nahīñ ma.alūm un ko yaad hai kyā

hameñ to ek din bhī bhūltā na.iiñ

bhulā ho gar koī samjhā.e un ko

namak-pāshī meñ tāsīr-e-shifā na.iiñ

kahāñ par kaun thā jo ab nahīñ hai

kisī se pūchhne kā hausla na.iiñ

kisī kā sochnā ruk ruk ke chalnā

munāsib thā magar achchhā lagā na.iiñ

koī taslīm kartā hī nahīñ kuchh

abhī shāyad koī itnā baḌā na.iiñ

hameñ jaise koī zid ho ga.ī thī

jo duniyā ne kahā ham ne kiyā na.iiñ

ḳhud apne vāste mushkil hue jab

hameñ āsān phir kuchh bhī milā na.iiñ

libās-o-vaza shāyad ek se hoñ

magar andar se koī ek sā na.iiñ

abhī to zehn saiqal ho rahā hai

jo likhnā hai abhī ham ne likhā na.iiñ

abhī TukḌe ikaTThe ho rahe haiñ

abhī TuuTā huā rishta juḌā na.iiñ

ye manzar is jagah pahle nahīñ thā

to kyā hai phir agar ye mo.ajiza na.iiñ

na.ī bastī meñ ābādī bahut hai

magar koī kisī ko jāntā na.iiñ

ham ik tanhā sadī ke pesh-rau haiñ

hamārā aisā-vaisā martaba na.iiñ

shajar phūTegā phir ik din zamīñ se

hai da.avā zindagī kā maut kā na.iiñ

ḳhudā se rābta kar ke to dekho

phir us ke ba.ad kah denā ḳhudā na.iiñ

chahār-atrāf aisī thī chakā-chauñd

kisī kī aañkh se parda haTā na.iiñ

ye lagtā hai magar ye sach nahīñ hai

ki puurī baat koī jāntā na.iiñ

yahī tūfān bhī barpā kareñge

hamāre dost paanī aur havā na.iiñ

isī miTTī meñ miTTī ho raheñge

isī miTTī ko koī pūchhtā na.iiñ

uThī sho.aloñ se bachche khelte the

lagī phir aag to kuchh bhī bachā na.iiñ

anāsir hukm kī ta.amīl meñ haiñ

duā kī dastaras se māvarā na.iiñ

agar mub.ham rahā insān to kyā

yahāñ to āsmānoñ kā sirā na.iiñ

hai mushkil ḳhauf ko tasḳhīr karnā

samundar paar karnā marhala na.iiñ

vahāñ ke phuul chunñā chāhte haiñ

hamārā jis zamīñ se rābta na.iiñ

usī ke dhyān meñ uljhe hue haiñ

hameñ jo aañkh uThā ke dekhtā na.iiñ

hameñ apnī ḳhabar bas is qadar hai

ki aglī saañs tak kā bhī patā na.iiñ

na jaane kyā hai phir jo māñgtā hai

ye dil kuchh bhī to us se māñgtā na.iiñ

tamām āsūdgī āsūdgī bas

magar aise bhī jiine kā mazā na.iiñ

barābar iztirāb aur be-yaqīnī

bahut baḌh jaa.e to ye bhī bhalā na.iiñ

to phir ham kis tarah se ḳhush raheñge

magar ḳhush is tarah koī rahā na.iiñ

ye sab be-kār kī bāteñ haiñ shāyad

hamārā asl meñ ye mas.ala na.iiñ

ye vo kyā toḌte haiñ joḌte haiñ

na jaane kyā hai jo ab tak banā na.iiñ

ġhubār-e-vaqt haiñ par mānte haiñ

qusūr is meñ zarā bhī vaqt kā na.iiñ

batānā soch kar ta.abīr is kī

muabbir ye ishāra raat kā na.iiñ

hamārī saañs ukhaḌ jaa.e to kyā hai

yahī to zindagī kī intihā na.iiñ

zabāñ chhāloñ se bhar jaa.e to kyā hai

kabhī muñh se hameñ kuchh bhūlnā na.iiñ

adhūrī baat rah jaa.e to kyā hai

adhūrī baat ko bhī kyā baqā na.iiñ

na aanī thī na aa.ī duniyā-dārī

magar sharmindagī us kī zarā na.iiñ

bahut hī duur se āvāz aa.ī

hameñ aise lagā ham ne sunā na.iiñ

kabhī lagtā hai ham vaise nahīñ haiñ

kabhī lagtā hai ham us se judā na.iiñ

jo zāhir thā use to kyā chhupāte

chhupānā chāhte the jo chhupā na.iiñ

musāfir thoḌī mohlat hai tire paas

safīna itnī jaldī Dūbtā na.iiñ

bahut kuchh hai jo paanī pe likhā hai

kisī ne aaj tak bhī jo paḌhā na.iiñ

kisī kī maut kā matlab fanā hai

kisī kī maut kā matlab fanā na.iiñ

ye duniya dur tak ka silsila nain

hamein us ke liye kuchh sochna nain

ye putla is qadar maghrur kyun hai

to kya ye aasmanon se gira nain

bahut pahle ye din aane se pahle

jo hona tha abhi tak bhi hua nain

sabhi haq faisle ke muntazir hain

kisi ne KHun ka badla liya nain

abhi suraj mein thoDi raushni hai

zamin ka rang bhi phika paDa nain

dar-o-diwar ke meamar dekhen

ye ghar buniyaad se ab bhi hila nain

ye rasta shahr ke naqshe mein hoga

ye rasta sirf aankhon mein khula nain

ye duniya is liye aadhi hai ab tak

piyala dard se pura bhara nain

wahi aankhen wahi chehra wahi baat

kisi taswir mein kuchh bhi naya nain

hamein kuchh kaam karne hain yahan par

ye mana kaam ka koi sila nain

usi ke mashware ko mante hain

ye dil jaisa bhi hai utna bura nain

badan ki KHak par chhinTe lahu ke

kahan se aae hain hum ne kaha nain

musalsal rone wale hans rahe hain

ye koi chhoTa-moTa waqia nain

kisi ke dukh ka charcha ho raha hai

koi dukh aise dukh se to siwa nain

ye baat ek roz duniya man legi

hamare jurm ki koi saza nain

koi sota nahin hai kya sar-e-sham

koi bhi munh andhere jagta nain

nahin malum un ko yaad hai kya

hamein to ek din bhi bhulta nain

bhula ho gar koi samjhae un ko

namak-pashi mein tasir-e-shifa nain

kahan par kaun tha jo ab nahin hai

kisi se puchhne ka hausla nain

kisi ka sochna ruk ruk ke chalna

munasib tha magar achchha laga nain

koi taslim karta hi nahin kuchh

abhi shayad koi itna baDa nain

hamein jaise koi zid ho gai thi

jo duniya ne kaha hum ne kiya nain

KHud apne waste mushkil hue jab

hamein aasan phir kuchh bhi mila nain

libas-o-waza shayad ek se hon

magar andar se koi ek sa nain

abhi to zehn saiqal ho raha hai

jo likhna hai abhi hum ne likha nain

abhi TukDe ikaTThe ho rahe hain

abhi TuTa hua rishta juDa nain

ye manzar is jagah pahle nahin tha

to kya hai phir agar ye moajiza nain

nai basti mein aabaadi bahut hai

magar koi kisi ko jaanta nain

hum ek tanha sadi ke pesh-rau hain

hamara aisa-waisa martaba nain

shajar phuTega phir ek din zamin se

hai dawa zindagi ka maut ka nain

KHuda se rabta kar ke to dekho

phir us ke baad kah dena KHuda nain

chahaar-atraf aisi thi chaka-chaund

kisi ki aankh se parda haTa nain

ye lagta hai magar ye sach nahin hai

ki puri baat koi jaanta nain

yahi tufan bhi barpa karenge

hamare dost pani aur hawa nain

isi miTTi mein miTTi ho rahenge

isi miTTi ko koi puchhta nain

uThi shoalon se bachche khelte the

lagi phir aag to kuchh bhi bacha nain

anasir hukm ki tamil mein hain

dua ki dastaras se mawara nain

agar mubham raha insan to kya

yahan to aasmanon ka sira nain

hai mushkil KHauf ko tasKHir karna

samundar par karna marhala nain

wahan ke phul chunna chahte hain

hamara jis zamin se rabta nain

usi ke dhyan mein uljhe hue hain

hamein jo aankh uTha ke dekhta nain

hamein apni KHabar bas is qadar hai

ki agli sans tak ka bhi pata nain

na jaane kya hai phir jo mangta hai

ye dil kuchh bhi to us se mangta nain

tamam aasudgi aasudgi bas

magar aise bhi jine ka maza nain

barabar iztirab aur be-yaqini

bahut baDh jae to ye bhi bhala nain

to phir hum kis tarah se KHush rahenge

magar KHush is tarah koi raha nain

ye sab be-kar ki baaten hain shayad

hamara asl mein ye masala nain

ye wo kya toDte hain joDte hain

na jaane kya hai jo ab tak bana nain

ghubar-e-waqt hain par mante hain

qusur is mein zara bhi waqt ka nain

batana soch kar tabir is ki

muabbir ye ishaara raat ka nain

hamari sans ukhaD jae to kya hai

yahi to zindagi ki intiha nain

zaban chhaalon se bhar jae to kya hai

kabhi munh se hamein kuchh bhulna nain

adhuri baat rah jae to kya hai

adhuri baat ko bhi kya baqa nain

na aani thi na aai duniya-dari

magar sharmindagi us ki zara nain

bahut hi dur se aawaz aai

hamein aise laga hum ne suna nain

kabhi lagta hai hum waise nahin hain

kabhi lagta hai hum us se juda nain

jo zahir tha use to kya chhupate

chhupana chahte the jo chhupa nain

musafir thoDi mohlat hai tere pas

safina itni jaldi Dubta nain

bahut kuchh hai jo pani pe likha hai

kisi ne aaj tak bhi jo paDha nain

kisi ki maut ka matlab fana hai

kisi ki maut ka matlab fana nain