یہ دنیا جب رعایت مانگتی ہے

یہ دنیا جب رعایت مانگتی ہے

ہر اک تحفے کی قیمت مانگتی ہے

تمہیں جلدی پڑی ہے شاہزادی

محبت ایک مدت مانگتی ہے

بلا اسباب خوشیاں چاہتا ہوں

مگر تسکین رشوت مانگتی ہے

پگھل کے آ رہی ہے برف نیچے

یہ بستی اب اجازت مانگتی ہے

اٹھو مایوسیوں کے پر ٹٹولو

کوئی پرواز شفقت مانگتی ہے

حکومت خود نہیں چلتی ہے لیکن

چلانے کی لیاقت مانگتی ہے

کساؤ روح پر کرتے ہی رہیے

وگرنہ یہ فضیلت مانگتی ہے

غزل کیسی بھی تم فرحانؔ کہہ دو

بالآخر یہ سماعت مانگتی ہے