ye duniya tab hasin itni nahin thi

ye duniyā tab hasīñ itnī nahīñ thī

merī jab ishq se bantī nahīñ thī

batāte the mujhe aa kar kabūtar

vo laḌkī jab vahāñ rahtī nahīñ thī

duā din raat karte the musavvir

tirī tasvīr par bantī nahīñ thī

ghaḌī ham us kī dī lauTāte kaise

hamārī zindagī chaltī nahīñ thī

sab apne ghar ko jaldī lauTte the

mirī hī shaam bas Dhaltī nahīñ thī

ḳhudā ke saath rahte the falak par

zamīñ vāloñ se jab bantī nahīñ thī

ayaañ kar detā thā maiñ sab nadī par

nadī mujh par magar khultī nahīñ thī

maiñ ḳhud ko rok letā ḳhud-kushī se

mirī mujh par magar chaltī nahīñ thī

ham ab ke chaar ḳhāne chit paḌe the

aur aage chaal bhī bantī nahīñ thī

ye duniya tab hasin itni nahin thi

meri jab ishq se banti nahin thi

batate the mujhe aa kar kabutar

wo laDki jab wahan rahti nahin thi

dua din raat karte the musawwir

teri taswir par banti nahin thi

ghaDi hum us ki di lauTate kaise

hamari zindagi chalti nahin thi

sab apne ghar ko jaldi lauTte the

meri hi sham bas Dhalti nahin thi

KHuda ke sath rahte the falak par

zamin walon se jab banti nahin thi

ayan kar deta tha main sab nadi par

nadi mujh par magar khulti nahin thi

main KHud ko rok leta KHud-kushi se

meri mujh par magar chalti nahin thi

hum ab ke chaar KHane chit paDe the

aur aage chaal bhi banti nahin thi