ye duniya zahiran shahkari si malum hoti hai

ye duniyā zāhiran shahkārī sī ma.alūm hotī hai

ba-bātin ye hameñ bekār sī ma.alūm hotī hai

ye kyā aalam hai kaisī dil kī hālat hai koī dekhe

ki shāḳh-e-gul bhī ab talvār sī ma.alūm hotī hai

ḳhudā ma.alūm kaisā vaqt aaya hai gulistāñ par

pareshāñ gul kalī bīmār sī ma.alūm hotī hai

zamāna laakh dīvāna samajhtā hai magar ham ko

zamāne kī nazar bīmār sī ma.alūm hotī hai

qanā.at jis kī fitrat ho use nān-e-javīñ tak bhī

hamesha meva-e-qandhār sī mā'lūm hotī hai

ba-zāhir rabt hai ahl-e-jahāñ meñ lekin ai hamdam

diloñ ke darmiyāñ dīvār sī ma.alūm hotī hai

jo hogā sāmnā to ḳhāliq-e-duniyā se kah deñge

tirī duniyā hameñ bekār sī ma.alūm hotī hai

jafāoñ se milā hai iltifāt-e-ḳhās ai 'lāġhar'

jafā bhī pyaar kā iz.hār sī ma.alūm hotī hai

ye duniya zahiran shahkari si malum hoti hai

ba-baatin ye hamein bekar si malum hoti hai

ye kya aalam hai kaisi dil ki haalat hai koi dekhe

ki shaKH-e-gul bhi ab talwar si malum hoti hai

KHuda malum kaisa waqt aaya hai gulistan par

pareshan gul kali bimar si malum hoti hai

zamana lakh diwana samajhta hai magar hum ko

zamane ki nazar bimar si malum hoti hai

qanaat jis ki fitrat ho use nan-e-jawin tak bhi

hamesha mewa-e-qandhaar si ma'lum hoti hai

ba-zahir rabt hai ahl-e-jahan mein lekin ai hamdam

dilon ke darmiyan diwar si malum hoti hai

jo hoga samna to KHaliq-e-duniya se kah denge

teri duniya hamein bekar si malum hoti hai

jafaon se mila hai iltifat-e-KHas ai 'laghar'

jafa bhi pyar ka izhaar si malum hoti hai