ye faisla bhi mere dast-e-ba-kamal mein tha

ye faisla bhī mire dast-e-bā-kamāl meñ thā

jo chhīnñe meñ maza hai vo kab savāl meñ thā

kis āftāb kī aahaT se shahr jaag uThā

vagarna maiñ bhī kahīñ mast apne haal meñ thā

tire bayāñ ne dikhāyā jo aa.ina to khulā

ki har shu.ūr mire gosha-e-ḳhayāl meñ thā

mire safar ke liye roz-o-shab bane hī nahīñ

tumhīñ kaho ki maiñ kab qaid-e-māh-o-sāl meñ thā

ragoñ meñ reg-e-ravāñ thā gurez-pā.ī kā

lahū asiir ajab ḳhvāhishoñ ke jaal meñ thā

mire gurez ne ahd-e-sitam ko tuul diyā

ye eqtidār to kab se yūñhī zavāl meñ thā

ajiib lams kī lazzat hai merī bāñhoñ meñ

vahī maza hai jo us ḳhvāb ke visāl meñ thā

ye faisla bhi mere dast-e-ba-kamal mein tha

jo chhinne mein maza hai wo kab sawal mein tha

kis aaftab ki aahaT se shahr jag uTha

wagarna main bhi kahin mast apne haal mein tha

tere bayan ne dikhaya jo aaina to khula

ki har shuur mere gosha-e-KHayal mein tha

mere safar ke liye roz-o-shab bane hi nahin

tumhin kaho ki main kab qaid-e-mah-o-sal mein tha

ragon mein reg-e-rawan tha gurez-pai ka

lahu asir ajab KHwahishon ke jal mein tha

mere gurez ne ahd-e-sitam ko tul diya

ye eqtidar to kab se yunhi zawal mein tha

ajib lams ki lazzat hai meri banhon mein

wahi maza hai jo us KHwab ke visal mein tha