ye faisla to bahut ghair-munsifana laga

ye faisla to bahut ġhair-munsifāna lagā

hamārā sach bhī adālat ko bāġhiyāna lagā

hamāre ḳhuun se bhī us kī ḳhushbueñ phūTīñ

hameñ to qatl bhī kar ke vo bevafā na lagā

lagā.ī aag bhī is ehtimām se us ne

hamārā jaltā huā ghar nigār-ḳhāna lagā

ham itnā ruuh kī gahrā.iyoñ ke aadī the

ki Dūbtā huā dil Dūbtā huā na lagā

ye ḳhaam maal milegā bahut hī kam dāmoñ

lahū ho jis kī zarūrat vo kārḳhāna lagā

kisī bhī shaḳhs se jab us kī ḳhairiyat pūchhī

to apnā lahja-e-pursish bhī tāziyāna lagā

ye kaun log 'muzaffar' kī kar rahe the burā.ī

mile haiñ ham bhī bahut ham ko vo burā na lagā

ye faisla to bahut ghair-munsifana laga

hamara sach bhi adalat ko baghiyana laga

hamare KHun se bhi us ki KHushbuen phuTin

hamein to qatl bhi kar ke wo bewafa na laga

lagai aag bhi is ehtimam se us ne

hamara jalta hua ghar nigar-KHana laga

hum itna ruh ki gahraiyon ke aadi the

ki Dubta hua dil Dubta hua na laga

ye KHam mal milega bahut hi kam damon

lahu ho jis ki zarurat wo karKHana laga

kisi bhi shaKHs se jab us ki KHairiyat puchhi

to apna lahja-e-pursish bhi taziyana laga

ye kaun log 'muzaffar' ki kar rahe the burai

mile hain hum bhi bahut hum ko wo bura na laga