ye fana meri baqa ho jaise

ye fanā merī baqā ho jaise

tū hī chehre pe likhā ho jaise

tere hoñToñ pe tabassum aisā

phuul sahrā meñ khilā ho jaise

yuuñ pukārā hai kisī ne mujh ko

naam terā hī liyā ho jaise

us ne pherī jo nigāheñ to lagā

shīsha patthar pe girā ho jaise

har taraf lams hai zinda us kā

ghar meñ sadiyoñ vo rahā ho jaise

zahr mahbūb ke hāthoñ pā kar

yuuñ piyā maiñ ne davā ho jaise

vasl kī shaam kā ik ik lamha

merī muTThī meñ dabā ho jaise

ye fana meri baqa ho jaise

tu hi chehre pe likha ho jaise

tere honTon pe tabassum aisa

phul sahra mein khila ho jaise

yun pukara hai kisi ne mujh ko

nam tera hi liya ho jaise

us ne pheri jo nigahen to laga

shisha patthar pe gira ho jaise

har taraf lams hai zinda us ka

ghar mein sadiyon wo raha ho jaise

zahr mahbub ke hathon pa kar

yun piya main ne dawa ho jaise

wasl ki sham ka ek ek lamha

meri muTThi mein daba ho jaise