ye faza-e-nil-gun ye baal-o-par kafi nahin

ye fazā-e-nīl-gūñ ye bāl-o-par kaafī nahīñ

māh-o-anjum tak mirā zauq-e-safar kaafī nahīñ

ek saa.at ik sadī hai ik nazar āfāq-gīr

ab nizām-e-gardish-e-shām-o-sahar kaafī nahīñ

phir junūñ ko vus.at-e-aflāk hai koh-e-nidā

ai dil-e-dīvāna dasht-e-pur-ḳhatar kaafī nahīñ

ye havā-e-nam ye siine meñ sulagtī aag sī

aah ye umr-e-ravāñ kī rah-guzar kaafī nahīñ

phir mashiyyat se ulajhtī hai mirī dīvāngī

nāla-e-shab-gīr ashkoñ ke guhar kaafī nahīñ

ārzū-e-be-karāñ hai aur jism-e-nā-tavāñ

kyā rag-e-jāñ ke liye ye neshtar kaafī nahīñ

ḳhunkī-e-shabnam se ġhunche ko nahīñ taskīn-e-qalb

zaḳhm-e-gul ko ab nasīm-e-chāra-gar kaafī nahīñ

shīsha-e-shab meñ bharī hai 'fauq' jo sahbā-e-kaif

qatra qatra bhī piyūñ to raat bhar kaafī nahīñ

ye faza-e-nil-gun ye baal-o-par kafi nahin

mah-o-anjum tak mera zauq-e-safar kafi nahin

ek saat ek sadi hai ek nazar aafaq-gir

ab nizam-e-gardish-e-sham-o-sahar kafi nahin

phir junun ko wusat-e-aflak hai koh-e-nida

ai dil-e-diwana dasht-e-pur-KHatar kafi nahin

ye hawa-e-nam ye sine mein sulagti aag si

aah ye umr-e-rawan ki rah-guzar kafi nahin

phir mashiyyat se ulajhti hai meri diwangi

nala-e-shab-gir ashkon ke guhar kafi nahin

aarzu-e-be-karan hai aur jism-e-na-tawan

kya rag-e-jaan ke liye ye neshtar kafi nahin

KHunki-e-shabnam se ghunche ko nahin taskin-e-qalb

zaKHm-e-gul ko ab nasim-e-chaara-gar kafi nahin

shisha-e-shab mein bhari hai 'fauq' jo sahba-e-kaif

qatra qatra bhi piyun to raat bhar kafi nahin