ye ghalat hai ai dil-e-bad-guman ki wahan kisi ka guzar nahin

ye ġhalat hai ai dil-e-bad-gumāñ ki vahāñ kisī kā guzar nahīñ

faqat is liye ye hijāb hai ki kisī ko tāb-e-nazar nahīñ

kaho kuchh haqīqat-e-mushtahar ki mujhe kahīñ kī ḳhabar nahīñ

ye manāzir-e-do-jahāñ haiñ kyā jo fareb-e-zauq-e-nazar nahīñ

kisī aah meñ nahīñ soz jab kisī naale meñ jab asar nahīñ

ye kamāl-e-sozish-e-dil nahīñ ye faroġh-e-dāġh-e-jigar nahīñ

chamak uTh rahī hai jo pai-ba-pai ye tajalliyoñ kā ḳhazāna hai

ye hujūm-e-barq-e-tapāñ nahīñ ye matā-e-dard-e-jigar nahīñ

ye hai ehtimām-e-hijāb kyuuñ ye hai band-o-bast-e-naqāb kyuuñ

tumheñ aañkh bhar ke maiñ dekh luuñ vo nazar nahīñ vo jigar nahīñ

vo rahīn-e-lazzat-e-ġham huuñ maiñ na milī azal meñ jise tarab

maiñ hī us karam kā thā muntazir maiñ hī mustahiq thā magar nahīñ

kabhī vaqt-e-nāz-o-niyāz hai kabhī mahv-e-zulf-e-ayāz hai

magar us pe bhī dil-e-ġhaznavī karam-āshnā-e-nazar nahīñ

ye tayyunāt-e-nizām the faqat ek parda-e-māsivā

ḳhabar us kī jab se huī mujhe koī is jahāñ kī ḳhabar nahīñ

tujhe kār-gāh-e-fanā batā inhī hastiyoñ pe ġhurūr hai

jo sharīk-e-sūd-o-ziyāñ nahīñ jo rahīn-e-naf-o-zarar nahīñ

chamak ai charāġh-e-zamīr ab ki tulūa mehr-e-kamāl ho

vo lahad huuñ tīra-o-tār maiñ ki jahāñ bayāz-e-sahar nahīñ

na vo soz hai na vo saaz hai na vo dil ḳhazāna-e-rāz hai

vo sharar huuñ jis meñ dhuāñ nahīñ vo hajar huuñ jis meñ sharar nahīñ

nazar us kī hai mirī samt abhī mirā dāman-e-goharīñ na dekh

abhī ḳhūn-e-dil hai rukā huā abhī āñsuoñ se ye tar nahīñ

chamak ai tajallī-e-dil-rubā nikal ai ḳhulāsa-e-duā

ki nazāra-e-do-jahāñ faqat ye ma.āl-e-zauq-e-nazar nahīñ

ye jubba-sā.ī-e-be-mahal mujhe shab ko de rahī thī ḳhabar

na miTā de zulmat-e-dahr jo vo nishān-e-sajda-e-dar nahīñ

ye taġhayyurāt-e-jahāñ nahīñ asar-e-talavvun-e-tab.a hai

tirī ik nazar kā karishma ye falak kī gardish-e-sar nahīñ

kaho sham.a se ki ye naql kyā koī apnā qissa-e-ġham kahe

kare ab fasāne ko muḳhtasar ki mujhe umīd-e-sahar nahīñ

hai talāsh apnī faqat mujhe maiñ milūñ to hoñgī shikāyateñ

mujhe ab kisī se gilā nahīñ mujhe ab kisī kī ḳhabar nahīñ

yahī manzileñ haiñ vo manzileñ ki jahannam un se panāh le

dil-e-nā-shanās-e-rah-e-vafā mujhe koī ḳhauf-o-ḳhatar nahīñ

mirī ġhaflatoñ kā gilā na kar yahī nazm-e-kaun-o-fasād hai

ḳhabar is tilism-e-numūd kī mujhe ho chukī hai magar nahīñ

sabaq us se le ki ḳhabar mile tujhe aane vaale zamāne kī

hai taġhayyurāt kā aa.ina ye shikasta kāsa-e-sar nahīñ

ye haiñ daar terī nigāh ke kisī nā-tavāñ se rukeñge kyā

dil-e-dāġh dāġh-e-'azīz' hai sitam-āzmā ye sipar nahīñ

ye ghalat hai ai dil-e-bad-guman ki wahan kisi ka guzar nahin

faqat is liye ye hijab hai ki kisi ko tab-e-nazar nahin

kaho kuchh haqiqat-e-mushtahar ki mujhe kahin ki KHabar nahin

ye manazir-e-do-jahan hain kya jo fareb-e-zauq-e-nazar nahin

kisi aah mein nahin soz jab kisi nale mein jab asar nahin

ye kamal-e-sozish-e-dil nahin ye farogh-e-dagh-e-jigar nahin

chamak uTh rahi hai jo pai-ba-pai ye tajalliyon ka KHazana hai

ye hujum-e-barq-e-tapan nahin ye mata-e-dard-e-jigar nahin

ye hai ehtimam-e-hijab kyun ye hai band-o-bast-e-naqab kyun

tumhein aankh bhar ke main dekh lun wo nazar nahin wo jigar nahin

wo rahin-e-lazzat-e-gham hun main na mili azal mein jise tarab

main hi us karam ka tha muntazir main hi mustahiq tha magar nahin

kabhi waqt-e-naz-o-niyaz hai kabhi mahw-e-zulf-e-ayaz hai

magar us pe bhi dil-e-ghaznawi karam-ashna-e-nazar nahin

ye tayyunat-e-nizam the faqat ek parda-e-masiwa

KHabar us ki jab se hui mujhe koi is jahan ki KHabar nahin

tujhe kar-gah-e-fana bata inhi hastiyon pe ghurur hai

jo sharik-e-sud-o-ziyan nahin jo rahin-e-naf-o-zarar nahin

chamak ai charagh-e-zamir ab ki tulua mehr-e-kamal ho

wo lahad hun tira-o-tar main ki jahan bayaz-e-sahar nahin

na wo soz hai na wo saz hai na wo dil KHazana-e-raaz hai

wo sharar hun jis mein dhuan nahin wo hajar hun jis mein sharar nahin

nazar us ki hai meri samt abhi mera daman-e-goharin na dekh

abhi KHun-e-dil hai ruka hua abhi aansuon se ye tar nahin

chamak ai tajalli-e-dil-ruba nikal ai KHulasa-e-dua

ki nazara-e-do-jahan faqat ye maal-e-zauq-e-nazar nahin

ye jubba-sai-e-be-mahal mujhe shab ko de rahi thi KHabar

na miTa de zulmat-e-dahr jo wo nishan-e-sajda-e-dar nahin

ye taghayyuraat-e-jahan nahin asar-e-talawwun-e-taba hai

teri ek nazar ka karishma ye falak ki gardish-e-sar nahin

kaho shama se ki ye naql kya koi apna qissa-e-gham kahe

kare ab fasane ko muKHtasar ki mujhe umid-e-sahar nahin

hai talash apni faqat mujhe main milun to hongi shikayaten

mujhe ab kisi se gila nahin mujhe ab kisi ki KHabar nahin

yahi manzilen hain wo manzilen ki jahannam un se panah le

dil-e-na-shanas-e-rah-e-wafa mujhe koi KHauf-o-KHatar nahin

meri ghaflaton ka gila na kar yahi nazm-e-kaun-o-fasad hai

KHabar is tilism-e-numud ki mujhe ho chuki hai magar nahin

sabaq us se le ki KHabar mile tujhe aane wale zamane ki

hai taghayyuraat ka aaina ye shikasta kasa-e-sar nahin

ye hain dar teri nigah ke kisi na-tawan se rukenge kya

dil-e-dagh dagh-e-'aziz' hai sitam-azma ye sipar nahin