ye gila dil se to hargiz nahin jaana sahab

ye gila dil se to hargiz nahīñ jaanā sāhab

sab ne jaanā hameñ par tum ne na jaanā sāhab

in bayānoñ se ġharaz ham ne ye jaanā sāhab

aap ko ḳhuun hamārā hai bahānā sāhab

chhoḌ kar aap ke kūche ko phirūñ sahrā meñ

so to majnūñ sā nahīñ huuñ maiñ divānā sāhab

yaad the ham ko javānī meñ to sau makr-o-fareb

ik karishma thā tumheñ daam meñ laanā sāhab

ab jo būḌhe haiñ to ab bhī hameñ shaitān 'nazīr'

hañs ke kahtā hai ajī aa.iye nānā-sāhib

ye gila dil se to hargiz nahin jaana sahab

sab ne jaana hamein par tum ne na jaana sahab

in bayanon se gharaz hum ne ye jaana sahab

aap ko KHun hamara hai bahana sahab

chhoD kar aap ke kuche ko phirun sahra mein

so to majnun sa nahin hun main diwana sahab

yaad the hum ko jawani mein to sau makr-o-fareb

ek karishma tha tumhein dam mein lana sahab

ab jo buDhe hain to ab bhi hamein shaitan 'nazir'

hans ke kahta hai aji aaiye nana-sahib