ye gul bhi zinat-e-aghosh-e-dariya-e-qaza nikle

ye gul bhī zīnat-e-āġhosh-e-dariyā-e-qazā nikle

jinheñ ham bā-vafā samjhe the vo bhī bevafā nikle

natīja justujū-e-shauq kā kyā jaane kyā nikle

pas-e-parda ye mumkin hai vahī rañgīñ-adā nikle

karishma hai ye saarā ishq kā hī varna kab mumkin

lahū ke qatre qatre se anal-haq kī sadā nikle

matā-e-zindagī ārām-e-jāñ sabr-o-qarār-e-dil

ḳhudā kī shaan hai ham un ko kyā samjhe vo kyā nikle

hue majrūh barg-e-gul inhīñ ḳhāroñ se gulshan ke

chaman ke pāsbāñ hī bāni-e-jaur-o-jafā nikle

ma.āz-allāh ilzām apnī barbādī kā ġhairoñ par

Dubone vaale kashtī ke jab apne nāḳhudā nikle

karūñ kis kā gila kahte hue bhī sharm aatī hai

raqīb afsos apne hī purāne āshnā nikle

hamāre baad vo aa.e ayādat ko to kyā aa.e

kisī ke is tarah nikle agar armāñ to kyā nikle

bahut mushkil hai 'aish' is daur meñ nikle koī hasrat

ye kyā kam hai koī dāman agar apnā bachā nikle

ye gul bhi zinat-e-aghosh-e-dariya-e-qaza nikle

jinhen hum ba-wafa samjhe the wo bhi bewafa nikle

natija justuju-e-shauq ka kya jaane kya nikle

pas-e-parda ye mumkin hai wahi rangin-ada nikle

karishma hai ye sara ishq ka hi warna kab mumkin

lahu ke qatre qatre se anal-haq ki sada nikle

mata-e-zindagi aaram-e-jaan sabr-o-qarar-e-dil

KHuda ki shan hai hum un ko kya samjhe wo kya nikle

hue majruh barg-e-gul inhin KHaron se gulshan ke

chaman ke pasban hi bani-e-jaur-o-jafa nikle

maaz-allah ilzam apni barbaadi ka ghairon par

Dubone wale kashti ke jab apne naKHuda nikle

karun kis ka gila kahte hue bhi sharm aati hai

raqib afsos apne hi purane aashna nikle

hamare baad wo aae ayaadat ko to kya aae

kisi ke is tarah nikle agar arman to kya nikle

bahut mushkil hai 'aish' is daur mein nikle koi hasrat

ye kya kam hai koi daman agar apna bacha nikle