ye hadisa mujhe hairan kar gaya sar-e-sham

ye hādisa mujhe hairān kar gayā sar-e-shām

jo zaḳhm sub.h milā thā vo bhar gayā sar-e-shām

mile the ham kahīñ kār-e-jahāñ ke mele meñ

use bhī jaldī thī aur maiñ bhī ghar gayā sar-e-shām

ye aaj kis ko achānak mirā ḳhayāl aayā

charāġh raah meñ ye kaun dhar gayā sar-e-shām

ḳhayāl-e-yār kī fursat bhī ab kise hai nasīb

ye phuul sub.h khilā aur bikhar gayā sar-e-shām

tamām din kī thakan se maiñ bujh rahā thā magar

kisī kī yaad kā chehra nikhar gayā sar-e-shām

shab-e-firāq kā ahvāl yaad aa hī gayā

phir ek tiir sā dil meñ utar gayā sar-e-shām

ye sub.h-o-shām mire is qadar hī mere haiñ

ki jī uThā huuñ sahar-dam to mar gayā sar-e-shām

ye hadisa mujhe hairan kar gaya sar-e-sham

jo zaKHm subh mila tha wo bhar gaya sar-e-sham

mile the hum kahin kar-e-jahan ke mele mein

use bhi jaldi thi aur main bhi ghar gaya sar-e-sham

ye aaj kis ko achanak mera KHayal aaya

charagh rah mein ye kaun dhar gaya sar-e-sham

KHayal-e-yar ki fursat bhi ab kise hai nasib

ye phul subh khila aur bikhar gaya sar-e-sham

tamam din ki thakan se main bujh raha tha magar

kisi ki yaad ka chehra nikhar gaya sar-e-sham

shab-e-firaq ka ahwal yaad aa hi gaya

phir ek tir sa dil mein utar gaya sar-e-sham

ye subh-o-sham mere is qadar hi mere hain

ki ji uTha hun sahar-dam to mar gaya sar-e-sham