یہ حال ہے مرے دل کا تری نظر کے قریب

یہ حال ہے مرے دل کا تری نظر کے قریب

ہو جس طرح سے نشیمن کوئی شرر کے قریب

ضیا ہے دل کے سلگنے کی بام و در کے قریب

شب فراق کھنچ آئی ہے یا سحر کے قریب

مہکتے زخم ادھر ہیں دل و جگر کے قریب

ادھر گلاب ہے بالیں پہ زلف و سر کے قریب

ہے دھوپ گردش دوراں کی تیز کچھ ایسی

کہ اپنا سایہ بھی آتا نہیں ہے ڈر کے قریب

اسے کہیں لب و رخسار مل کے لوٹ نہ لیں

حیات آئی ہے کیوں شبنم و شرر کے قریب

حنائی ہاتھ اٹھے تھے سلام کرنے کو

ہے آنچ ان کی ہمارے دل و جگر کے قریب

گلی گلی میں وہ پھرتا ہے آج آوارہ

کبھی جو آ کے بسا تھا تمہارے گھر کے قریب

نہ جانے کب کوئی اس رہ گزر پہ آ نکلے

جلائے بیٹھے ہیں اک شمع رہ گزر کے قریب

کوئی تو بات ہے بگڑے ہوئے جو تیور ہیں

کہاں سے آ گئے پتھر یہ شیشہ گر کے قریب

وہ ہم نہیں کہ جو بھاگیں بہار کے پیچھے

بہار آتی ہے چل کر ہمارے گھر کے قریب