ye hath apna mere hath mein thama dije

ye haath apnā mire haath meñ thamā diije

thakā huā huuñ zarā dil ko hausla diije

bas ab mile haiñ to kiije na ās-pās kā ḳhauf

jo sañg-e-rāh mile paañv se haTā diije

ye aur daur hai aur sab yahāñ mujhī se haiñ

vo kohkan kī hikāyāt sab bhulā diije

nahīñ hai aap ko fursat agar tavajjoh kī

to maiñ bhī lauTtā huuñ ghar ko aa gayā diije

mirā vajūd bhī hai aap kī jabīn kā daaġh

use bhī harf-e-ġhalat kī tarah miTā diije

kal aap ne jo chhuḌāyā to chhuT sakegā na haath

jo uljhaneñ haiñ mujhe aaj hī batā diije

ye khel khelā hai jab pyaar kā to phir ai dil

ab apne-āp ko bhī daav par lagā diije

tamām-umr bhaTaktī rahī nazar ki kahīñ

mile koī jise nazrāna-e-vafā diije

mirī to jumbish-e-lab bhī hai nā-ḳhushī kā sabab

ab aa.ī hai koī tarz-e-bayāñ sikhā diije

vafā hai jurm to iqrār-e-jurm hai mujh ko

ye maiñ huuñ ye mirā dil lījiye sazā diije

vo sahme sahme judā.ī ke muztarib lamhe

mirī nigāh meñ ik baar phir basā diije

gayā nahīñ hai abhī daur aap kā 'anjum'

jo dil udaas ho phir se use sadā diije

ye hath apna mere hath mein thama dije

thaka hua hun zara dil ko hausla dije

bas ab mile hain to kije na aas-pas ka KHauf

jo sang-e-rah mile panw se haTa dije

ye aur daur hai aur sab yahan mujhi se hain

wo kohkan ki hikayat sab bhula dije

nahin hai aap ko fursat agar tawajjoh ki

to main bhi lauTta hun ghar ko aa gaya dije

mera wajud bhi hai aap ki jabin ka dagh

use bhi harf-e-ghalat ki tarah miTa dije

kal aap ne jo chhuDaya to chhuT sakega na hath

jo uljhanen hain mujhe aaj hi bata dije

ye khel khela hai jab pyar ka to phir ai dil

ab apne-ap ko bhi daw par laga dije

tamam-umr bhaTakti rahi nazar ki kahin

mile koi jise nazrana-e-wafa dije

meri to jumbish-e-lab bhi hai na-KHushi ka sabab

ab aai hai koi tarz-e-bayan sikha dije

wafa hai jurm to iqrar-e-jurm hai mujh ko

ye main hun ye mera dil lijiye saza dije

wo sahme sahme judai ke muztarib lamhe

meri nigah mein ek bar phir basa dije

gaya nahin hai abhi daur aap ka 'anjum'

jo dil udas ho phir se use sada dije