ye hum ghazal mein jo harf-o-bayan banate hain

ye ham ġhazal meñ jo harf-o-bayāñ banāte haiñ

havā-e-ġham ke liye khiḌkiyāñ banāte haiñ

unheñ bhī dekh kabhī ai nigār-e-shām-e-bahār

jo ek rang se tasvīr-e-jāñ banāte haiñ

nigāh-e-nāz kuchh un kī bhī hai ḳhabar tujh ko

jo dhuup meñ haiñ magar badliyāñ banāte haiñ

hamārā kyā hai jo hotā hai jī udaas bahut

to gul tarāshte haiñ titliyāñ banāte haiñ

kisī tarah nahīñ jaatī fasurdagī dil kī

to zard rang kā ik āsmāñ banāte haiñ

dil-e-sitam-zada kyā hai lahū kī buuñd to hai

is ek buuñd ko ham be-karāñ banāte haiñ

balā kī dhuup thī din bhar to saa.e bunte the

añdherī raat hai chingāriyāñ banāte haiñ

hunar kī baat jo pūchho to muḳhtasar ye hai

kashīd karte haiñ aag aur dhuāñ banāte haiñ

ye hum ghazal mein jo harf-o-bayan banate hain

hawa-e-gham ke liye khiDkiyan banate hain

unhen bhi dekh kabhi ai nigar-e-sham-e-bahaar

jo ek rang se taswir-e-jaan banate hain

nigah-e-naz kuchh un ki bhi hai KHabar tujh ko

jo dhup mein hain magar badliyan banate hain

hamara kya hai jo hota hai ji udas bahut

to gul tarashte hain titliyan banate hain

kisi tarah nahin jati fasurdagi dil ki

to zard rang ka ek aasman banate hain

dil-e-sitam-zada kya hai lahu ki bund to hai

is ek bund ko hum be-karan banate hain

bala ki dhup thi din bhar to sae bunte the

andheri raat hai chingariyan banate hain

hunar ki baat jo puchho to muKHtasar ye hai

kashid karte hain aag aur dhuan banate hain