یہ ہنگامے تماشے کم نہ ہوں گے

یہ ہنگامے تماشے کم نہ ہوں گے

مگر محفل میں تیری ہم نہ ہوں گے

بڑھاؤ خوف سے کشتی نہ روکو

مسیحاؤ یہ طوفاں کم نہ ہوں گے

شب ہجراں ستارے گن رہے ہو

ستارے زخم کا مرہم نہ ہوں گے

زبانوں پر لگا دو قفل لیکن

کبھی الفت کے چرچے کم نہ ہوں گے

چلیں گے تب سبھی بے خوف ہو کر

کسی کے ہاتھ میں جب بم نہ ہوں گے

یہاں جمہوریت کچلی گئی ہے

فسادات و تعصب کم نہ ہوں گے

غزل گوئی چلے گی یوں ہی ذاکرؔ

ہمارے جیسے ہوں گے ہم نہ ہوں گے