ye har ek shaKHs ke apne tasawwur aur guman tak hai

ye har ik shaḳhs ke apne tasavvur aur gumāñ tak hai

kise ma.alūm hai varna had-e-irfāñ kahāñ tak hai

hameñ to dekhnā hai himmat-o-jur.at kahāñ tak hai

hamārī zindagī varna faqat zabt-e-fuġhāñ tak hai

junūn-e-ishq meñ āh-o-fuġhāñ shikva gila kaisā

agar hai bhī to vo āḳhir hamāre mehrbāñ tak hai

junūñ kī vus.atoñ kā koī andāza na kar paayā

rasā.ī aql-e-insāñ kī faqat sūd-o-ziyāñ tak hai

qadam chalne se qāsir haiñ añdherī raat hai sar par

batā de kaash ye koī mujhe chalnā kahāñ tak hai

kisī bhī āstāñ par ab ḳhudī jaane nahīñ detī

hamārī iltijā to mālik-e-kaun-o-makāñ tak hai

hamesha ahl-e-dil hī vaqt ke dhāre badalte haiñ

jo buzdil haiñ rasā.ī un kī bas āh-o-fuġhāñ tak hai

pas-e-murdan koī bhī naam tak un kā nahīñ letā

jo samjhe the hamārā tazkira rahte jahāñ tak hai

bahār-e-gulsitāñ to hai ḳhudā ke haath ai 'lāġhar'

bas ik farz-e-nigahbānī nigāh-e-bāġhbāñ tak hai

ye har ek shaKHs ke apne tasawwur aur guman tak hai

kise malum hai warna had-e-irfan kahan tak hai

hamein to dekhna hai himmat-o-jurat kahan tak hai

hamari zindagi warna faqat zabt-e-fughan tak hai

junun-e-ishq mein aah-o-fughan shikwa gila kaisa

agar hai bhi to wo aaKHir hamare mehrban tak hai

junun ki wusaton ka koi andaza na kar paya

rasai aql-e-insan ki faqat sud-o-ziyan tak hai

qadam chalne se qasir hain andheri raat hai sar par

bata de kash ye koi mujhe chalna kahan tak hai

kisi bhi aastan par ab KHudi jaane nahin deti

hamari iltija to malik-e-kaun-o-makan tak hai

hamesha ahl-e-dil hi waqt ke dhaare badalte hain

jo buzdil hain rasai un ki bas aah-o-fughan tak hai

pas-e-murdan koi bhi nam tak un ka nahin leta

jo samjhe the hamara tazkira rahte jahan tak hai

bahaar-e-gulsitan to hai KHuda ke hath ai 'laghar'

bas ek farz-e-nigahbani nigah-e-baghban tak hai