ye hasin honge mehrban mere baad

ye hasīñ hoñge mehrbāñ mire ba.ad

anDe deñgī ye murġhiyāñ mire ba.ad

maiñ to mar jā.ūñgā magar socho

kyā kareñgī tumhārī maañ mire ba.ad

ḳhuub abhī qahqaha lagā lo tum

bhoñ-bhoñ ro.o.ge mehrbāñ mire ba.ad

jab na dekhegā vo bahār-e-chaman

mar hī jā.egā bāġhbāñ mire ba.ad

baḌh ga.ī hai jo aaj kal mire dost

khīñchī jā.egī vo zabāñ mire ba.ad

dekh kar hashr-ḳhez hañgāme

rafū-chakkar huī amaañ mire ba.ad

tum shikam-ser kis tarah hoge

kaun pāTegā ye kuaañ mare ba.ad

gul to gul tañg aa ke kāñTe bhī

deñge gulchīñ ko gāliyāñ mire ba.ad

jis meñ aksar ḳhulūs miltā thā

ho ga.ī band vo dukāñ mire ba.ad

jahāñ jhukte haiñ sar salātīñ ke

hai muqaffal vo āstāñ mire ba.ad

roz uḌāte haiñ jo man-o-salvā

vo chabā.eñge Thurriyāñ mire ba.ad

mire qābil nahīñ abhī ye hasīñ

ye chaleñgī davanniyāñ mire ba.ad

lab-e-shīrīñ kī qadr hai mujh se

muñh pe bhinkeñgī makkhiyāñ mire ba.ad

sar-bulandī jinheñ nasīb hai 'shauq'

kal vo khā.eñge jūtiyāñ mire ba.ad

ye hasin honge mehrban mere baad

anDe dengi ye murghiyan mere baad

main to mar jaunga magar socho

kya karengi tumhaari man mere baad

KHub abhi qahqaha laga lo tum

bhon-bhon rooge mehrban mere baad

jab na dekhega wo bahaar-e-chaman

mar hi jaega baghban mere baad

baDh gai hai jo aaj kal mere dost

khinchi jaegi wo zaban mere baad

dekh kar hashr-KHez hangame

rafu-chakkar hui aman mere baad

tum shikam-ser kis tarah hoge

kaun paTega ye kuan mare baad

gul to gul tang aa ke kanTe bhi

denge gulchin ko galiyan mere baad

jis mein aksar KHulus milta tha

ho gai band wo dukan mere baad

jahan jhukte hain sar salatin ke

hai muqaffal wo aastan mere baad

roz uDate hain jo man-o-salwa

wo chabaenge Thurriyan mere baad

mere qabil nahin abhi ye hasin

ye chalengi dawanniyan mere baad

lab-e-shirin ki qadr hai mujh se

munh pe bhinkengi makkhiyan mere baad

sar-bulandi jinhen nasib hai 'shauq'

kal wo khaenge jutiyan mere baad