یہ ہوا کیسی چلی برہم زمانہ ہو گیا

یہ ہوا کیسی چلی برہم زمانہ ہو گیا

حال دہلی بزم عالم میں فسانہ ہو گیا

دل کسی فرد بشر کا خالی اس غم سے نہیں

غم یہ شائع کو بہ کو خانہ بہ خانہ ہو گیا

ہر سر مژگاں نہ ہو فوارۂ خوں کس طرح

غم زدوں کے دل میں جب غم کا خزانہ ہو گیا

ایک ہو تو روئیے کس کس کو روئیں یاد کر

دیکھ کر اس حادثہ کو دل دیوانہ ہو گیا

دیکھتے ہی دیکھتے آنکھوں میں آگے اپنے یاں

دم کے دم میں اور ہی کچھ کارخانہ ہو گیا

آہ گلگون بہار گلشن دہلی کو عیشؔ

موجۂ باد خزاں کیا تازیانہ ہو گیا