ye hijr ka mausam bhi guzar kyon nahin jata

ye hijr kā mausam bhī guzar kyoñ nahīñ jaatā

jaatā huā lagtā hai magar kyoñ nahīñ jaatā

bahtā huuñ to merī koī gahrā.ī bhī hogī

dariyā kī tarah ḳhud meñ utar kyoñ nahīñ jaatā

lāzim hai ki jaage kabhī bachche kī tarah bhī

ye shahr kisī ḳhvāb se Dar kyoñ nahīñ jaatā

malbe se nikal aatā hai aaseb kī mānind

logoñ kī tarah ḳhauf bhī mar kyoñ nahīñ jaatā

is kunj meñ muddat se bahār aa.ī nahīñ hai

ye baaġh mirī aañkh meñ bhar kyoñ nahīñ jaatā

ye bhed bhī khulne na diyā dar-badarī ne

ghar ke liye jaatā huuñ to ghar kyoñ nahīñ jaatā

malbūs se kyoñ minnat-e-yakjā.ī hai 'tābish'

maiñ TuuT chukā huuñ to bikhar kyoñ nahīñ jaatā

ye hijr ka mausam bhi guzar kyon nahin jata

jata hua lagta hai magar kyon nahin jata

bahta hun to meri koi gahrai bhi hogi

dariya ki tarah KHud mein utar kyon nahin jata

lazim hai ki jage kabhi bachche ki tarah bhi

ye shahr kisi KHwab se Dar kyon nahin jata

malbe se nikal aata hai aaseb ki manind

logon ki tarah KHauf bhi mar kyon nahin jata

is kunj mein muddat se bahaar aai nahin hai

ye bagh meri aankh mein bhar kyon nahin jata

ye bhed bhi khulne na diya dar-badari ne

ghar ke liye jata hun to ghar kyon nahin jata

malbus se kyon minnat-e-yakjai hai 'tabish'

main TuT chuka hun to bikhar kyon nahin jata