ye hirs-o-hawas ke saudai aadab-e-mohabbat kya jaanen

ye hirs-o-havas ke saudā.ī ādāb-e-mohabbat kyā jāneñ

ye ishq ke ma.anī kyā samjheñ ye husn kī qīmat kyā jāneñ

ham chūmte rahte haiñ har dam fitrat kī hasīñ peshānī ko

āzād-manash ham ahl-e-nazar qānūn-o-sharī.at kyā jāneñ

ho ḳhauf-e-jahannam jis meñ nihāñ jannat kī havas ho jis meñ ayaañ

allāh ke sāda-dil bande ham aisī ibādat kyā jāneñ

hoñ phūloñ kī sejeñ jin ke liye kāñToñ kī chubhan kyā samjheñge

jin ke na lagī ho choT kabhī vo dard kī lazzat kyā jāneñ

jo sīm-o-zar meñ tolte haiñ kaunain kī har ik jins-e-girāñ

insān ke dil kī qīmat ko vo sāhab-e-daulat kyā jāneñ

insān jahāñ bhī paate haiñ ham dil se use apnāte haiñ

ye maz.hab-o-millat ke jhagḌe ham ahl-e-mohabbat kyā jāneñ

ye hirs-o-hawas ke saudai aadab-e-mohabbat kya jaanen

ye ishq ke mani kya samjhen ye husn ki qimat kya jaanen

hum chumte rahte hain har dam fitrat ki hasin peshani ko

aazad-manash hum ahl-e-nazar qanun-o-shariat kya jaanen

ho KHauf-e-jahannam jis mein nihan jannat ki hawas ho jis mein ayan

allah ke sada-dil bande hum aisi ibaadat kya jaanen

hon phulon ki sejen jin ke liye kanTon ki chubhan kya samjhenge

jin ke na lagi ho choT kabhi wo dard ki lazzat kya jaanen

jo sim-o-zar mein tolte hain kaunain ki har ek jins-e-giran

insan ke dil ki qimat ko wo sahab-e-daulat kya jaanen

insan jahan bhi pate hain hum dil se use apnate hain

ye mazhab-o-millat ke jhagDe hum ahl-e-mohabbat kya jaanen