یہ ہوا اصلیت بتانے میں

یہ ہوا اصلیت بتانے میں

مشکلیں بڑھ گئیں زمانے میں

تب یہ چولہا دھواں اگلتا ہے

خون جلتا ہے کارخانے میں

غم دہکتے ہیں اس قدر دل میں

ہونٹ جلتے ہیں مسکرانے میں

یہ کرشمہ نہیں تو پھر کیا ہے

جی رہا ہوں ترے زمانے میں

سہمی سہمی ہیں فاختائیں یہاں

باز بیٹھے ہیں کچھ نشانے میں

عشق کی جنگ بھی عجب شے ہے

جیت ہوتی ہے ہار جانے میں

ہم فقیری سے لو لگا بیٹھے

ٹھوکریں مار کر خزانے میں

جسم ارشدؔ لہولہان ہوا

باغباں سے چمن بچانے میں