ye hua maal hubab ka jo hawa mein bhar ke ubhar gaya

ye huā ma.aal hubāb kā jo havā meñ bhar ke ubhar gayā

ki sadā hai lutma-e-mauj kī sar-e-pur-ġhurūr kidhar gayā

mujhe jazb-e-dil ne ai juz bahak ke rakhā qadam koī

mujhe par lagā.e shauq ne kahīñ thak ke maiñ jo Thahar gayā

mujhe piirī aur shabāb meñ jo hai imtiyāz to is qadar

koī jhoñkā bād-e-sahar kā thā mire paas se jo guzar gayā

asar us ke ishva-e-nāz kā jo huā vo kis se bayāñ karūñ

mujhe to ajal kī hai aarzū use vahm hai ki ye mar gayā

tujhe ai ḳhatīb-e-chaman nahīñ ḳhabar apne ḳhutba-e-shauq meñ

ki kitāb-e-gul kā varaq varaq tirī be-ḳhudī se bikhar gayā

kise tū sunātā hai ham-nashīñ ki hai ishva-e-dushman-e-aql-o-dīñ

tire kahne kā hai mujhe yaqīñ maiñ tire Darāne se Dar gayā

karūñ zikr kyā maiñ shabāb kā sune kaun qissa ye ḳhvāb kā

ye vo raat thī ki guzar ga.ī ye vo nashsha thā ki utar gayā

dil-e-nā-tavāñ ko takān ho mujhe us kī taab na thī zarā

ġham-e-intizār se bach gayā thā naved-e-vasl se mar gayā

mire sabr-o-tāb ke sāmne na hujūm-e-ḳhauf-o-rajā rahā

vo chamak ke barq rah ga.ī vo garaj ke abr guzar gayā

mujhe bahr-e-ġham se ubuur kī nahīñ fikr ai mire chāra-gar

nahīñ koī chāra-kār ab mire sar se aab guzar gayā

mujhe rāz-e-ishq ke zabt meñ jo maza milā hai na pūchhiye

mai-e-añgbīñ kā ye ghūñT thā ki gale se mere utar gayā

nahīñ ab jahān meñ dostī kabhī rāste meñ jo mil ga.e

nahīñ matlab ek ko ek se ye idhar chalā vo udhar gayā

agar aa ke ġhussa nahīñ rahā to lagī thī aag ki bujh ga.ī

jo hasad kā josh faro huā to ye zahr chaḌh ke utar gayā

tujhe 'nazm' vādi-e-shauq meñ abas ehtiyāt hai is qadar

kahīñ girte girte sambhal gayā kahīñ chalte chalte Thahar gayā

ye hua maal hubab ka jo hawa mein bhar ke ubhar gaya

ki sada hai lutma-e-mauj ki sar-e-pur-ghurur kidhar gaya

mujhe jazb-e-dil ne ai juz bahak ke rakha qadam koi

mujhe par lagae shauq ne kahin thak ke main jo Thahar gaya

mujhe piri aur shabab mein jo hai imtiyaz to is qadar

koi jhonka baad-e-sahar ka tha mere pas se jo guzar gaya

asar us ke ishwa-e-naz ka jo hua wo kis se bayan karun

mujhe to ajal ki hai aarzu use wahm hai ki ye mar gaya

tujhe ai KHatib-e-chaman nahin KHabar apne KHutba-e-shauq mein

ki kitab-e-gul ka waraq waraq teri be-KHudi se bikhar gaya

kise tu sunata hai ham-nashin ki hai ishwa-e-dushman-e-aql-o-din

tere kahne ka hai mujhe yaqin main tere Darane se Dar gaya

karun zikr kya main shabab ka sune kaun qissa ye KHwab ka

ye wo raat thi ki guzar gai ye wo nashsha tha ki utar gaya

dil-e-na-tawan ko takan ho mujhe us ki tab na thi zara

gham-e-intizar se bach gaya tha nawed-e-wasl se mar gaya

mere sabr-o-tab ke samne na hujum-e-KHauf-o-raja raha

wo chamak ke barq rah gai wo garaj ke abr guzar gaya

mujhe bahr-e-gham se ubur ki nahin fikr ai mere chaara-gar

nahin koi chaara-kar ab mere sar se aab guzar gaya

mujhe raaz-e-ishq ke zabt mein jo maza mila hai na puchhiye

mai-e-angbin ka ye ghunT tha ki gale se mere utar gaya

nahin ab jahan mein dosti kabhi raste mein jo mil gae

nahin matlab ek ko ek se ye idhar chala wo udhar gaya

agar aa ke ghussa nahin raha to lagi thi aag ki bujh gai

jo hasad ka josh faro hua to ye zahr chaDh ke utar gaya

tujhe 'nazm' wadi-e-shauq mein abas ehtiyat hai is qadar

kahin girte girte sambhal gaya kahin chalte chalte Thahar gaya