ye husn hai aah ya qayamat ki ek bhabhuka bhabhak raha hai

ye husn hai aah yā qayāmat ki ik bhabhūkā bhabhak rahā hai

falak pe sūraj bhī thartharā kar muñh us kā hairat se tak rahā hai

khajūrī choTī adā meñ moTī jafā meñ lambī vafā meñ chhoTī

hai aisī khoTī ki dil har ik kā har ek laT meñ laTak rahā hai

vo nīchī kāfir siyāh paTTī ki dil ke zaḳhmoñ pe bāñdhe paTTī

paḌhī hai jis ne ki us kī paTTī vo paTTī se sar Tapak rahā hai

vo māthā aisā ki chāñd nikhre phir us ke uupar vo baal bikhre

dil us ke dekhe se kyuuñ na bikhre ki misl-e-sūraj chamak rahā hai

vo chiin ḳhud-rav kaTīle abrū vo chashm jaadū nigāheñ aahū

vo palkeñ kaj-ḳhū ki jin kā har mū jigar ke andar khaTak rahā hai

ġhazab vo chanchal kī shoḳh-bīnī phir us pe nathunoñ kī nukta-chīnī

phir us pe nath kī vo ham-nashīnī phir us pe motī phaḌak rahā hai

lab o dahāñ bhī vo narm-o-nāzuk misī o paañ bhī vo qahr-o-āfat

suḳhan bhī karne kī vo latāfat ki goyā motī Tapak rahā hai

vo kaan ḳhūbī meñ chhak rahe haiñ javāhroñ meñ jhamak rahe haiñ

idhar ko jhumke jhamak rahe haiñ udhar kā baalā chamak rahā hai

surāhī gardan vo ābgīna phir aage siina bhī juuñ nagīna

bharā hai jis meñ tamām kiina ki juuñ nagīna damak rahā hai

kucheñ vo kuchh kuchh samar daraḳhtī kuchh un kī saḳhtī vo kuchh karaḳhtī

haiñ jis ne dekhe vo phal darḳhtī kaleja us kā dhaḌak rahā hai

vo surḳh añgiyā jo kas rahī hai vo chus rahī hai ukas rahī hai

kuchh aise Dhab se vo kas rahī hai ki us kā kasnā kasak rahā hai

vo peT dil ko lapeT leve vo naaf jī ko sameT leve

mazār jī kā jhapeT leve kuchh aisā peḌū phaḌak rahā hai

vo piiTh gorī kamar vo patlī ġhazab lagāvaT vo phir surīn kī

ab aage kahiye to kyā kahūñ maiñ ki hosh is jā ThiThuk rahā hai

faqat vo champe kī ik kalī hai kuchh ik muñdī hai kuchh ik khulī hai

salāḳh sone kī ik Dalī hai ki goyā kundan damak rahā hai

vo pyārī rāneñ vo gol sāqeñ vo kaf mulā.em vo narm pahuñche

kaḌī kaḌī se khaḌak rahī hai kaḌā kaḌe se khaḌak rahā hai

'nazīr' ḳhūbī maiñ us parī kī kahūñ kahāñ tak sanā banā kar

sifat sarāpā meñ jis ke likhne dil ab usī se aTak rahā hai

ye husn hai aah ya qayamat ki ek bhabhuka bhabhak raha hai

falak pe suraj bhi tharthara kar munh us ka hairat se tak raha hai

khajuri choTi ada mein moTi jafa mein lambi wafa mein chhoTi

hai aisi khoTi ki dil har ek ka har ek laT mein laTak raha hai

wo nichi kafir siyah paTTi ki dil ke zaKHmon pe bandhe paTTi

paDhi hai jis ne ki us ki paTTi wo paTTi se sar Tapak raha hai

wo matha aisa ki chand nikhre phir us ke upar wo baal bikhre

dil us ke dekhe se kyun na bikhre ki misl-e-suraj chamak raha hai

wo chin KHud-raw kaTile abru wo chashm jadu nigahen aahu

wo palken kaj-KHu ki jin ka har mu jigar ke andar khaTak raha hai

ghazab wo chanchal ki shoKH-bini phir us pe nathunon ki nukta-chini

phir us pe nath ki wo ham-nashini phir us pe moti phaDak raha hai

lab o dahan bhi wo narm-o-nazuk misi o pan bhi wo qahr-o-afat

suKHan bhi karne ki wo latafat ki goya moti Tapak raha hai

wo kan KHubi mein chhak rahe hain jawahron mein jhamak rahe hain

idhar ko jhumke jhamak rahe hain udhar ka baala chamak raha hai

surahi gardan wo aabgina phir aage sina bhi jun nagina

bhara hai jis mein tamam kina ki jun nagina damak raha hai

kuchen wo kuchh kuchh samar daraKHti kuchh un ki saKHti wo kuchh karaKHti

hain jis ne dekhe wo phal darKHti kaleja us ka dhaDak raha hai

wo surKH angiya jo kas rahi hai wo chus rahi hai ukas rahi hai

kuchh aise Dhab se wo kas rahi hai ki us ka kasna kasak raha hai

wo peT dil ko lapeT lewe wo naf ji ko sameT lewe

mazar ji ka jhapeT lewe kuchh aisa peDu phaDak raha hai

wo piTh gori kamar wo patli ghazab lagawaT wo phir surin ki

ab aage kahiye to kya kahun main ki hosh is ja ThiThuk raha hai

faqat wo champe ki ek kali hai kuchh ek mundi hai kuchh ek khuli hai

salaKH sone ki ek Dali hai ki goya kundan damak raha hai

wo pyari ranen wo gol saqen wo kaf mulaem wo narm pahunche

kaDi kaDi se khaDak rahi hai kaDa kaDe se khaDak raha hai

'nazir' KHubi main us pari ki kahun kahan tak sana bana kar

sifat sarapa mein jis ke likhne dil ab usi se aTak raha hai