یہ ابتدا ہے کوئی اختتام تھوڑی ہے

یہ ابتدا ہے کوئی اختتام تھوڑی ہے

ہے شام وصل بچھڑنے کی شام تھوڑی ہے

ابھی تو آئے ہو جانے کی بات کرتے ہو

محبتوں سے بڑا کوئی کام تھوڑی ہے

سبھی کو جانا ہے دنیا کو چھوڑ کر اک دن

کسی بشر کو بھی حاصل دوام تھوڑی ہے

جہاں میں نفرتیں بانٹو کسی کا قتل کرو

تمہارے واسطے کچھ بھی حرام تھوڑی ہے

تری نظر کا ہی ساقی ہوں بس میں دیوانہ

مری نظر میں صراحی‌ و جام تھوڑی ہے

وفا کسی کو میسر ہی کب ہوئی ہے یہاں

جو حکمراں ہے وہ راون ہے رام تھوڑی ہے

بہت سے لوگوں نے ہم پر ستم کئے ہیں ملکؔ

ہمارے لب پہ کسی کا بھی نام تھوڑی ہے